ក្លឹបយក្សអេស្ប៉ាញ Real Mardrid កំពុងសម្លឹងមើលផ្ទេរយកខ្សែការពារប្រេស៊ីល David Luiz ពីក្រុមតោខៀវ Chelsea នៅខែមករាខាងមុខ។
Luiz ត្រូវបានអ្នកចាត់ការ Antonio Conte កាត់ចោលបញ្ជីមិនឲ្យលេងប៉ុន្មានប្រកួត ក្រោយ Chelsea ចាញ់ Roma ៣-០ នៅ Champions League កាលពីខែ តុលា។ កីឡាករវ័យ៣០ឆ្នាំ ត្រូវបានគេឃើញហាត់តែម្នាក់ឯងជាបន្តបន្ទាប់ និងមិនបានដាក់បញ្ចូលឈ្មោះក្នុងបញ្ជីកីឡាករ ពេលប្រកួតជាមួយ Manchester United ,West Bromwich Albion និងLiverpool កន្លងទៅ។
ប្រកួតជាមួយ Swansea City នៅយប់ថ្ងៃពុធនេះ Luiz ក៏មិនមានវត្តមានដែរ ដោយលោក Conte លើកឡើងថា គេត្រូវការពេលបន្ថែមដើម្បីព្យាបាលរបួសជង្គង់។ យ៉ាងណាក្ដីកីឡាករសក់ច្រើនរូបនេះមិនចង់បាត់កៅអីលេងទេ គេចង់លេងឲ្យបានទៀងទាត់ដើម្បីមានកន្លែងមួយលេងសម្រាប់នៅ World Cup ឆ្នាំក្រោយ។ Luiz ត្រូវបានចាប់អារម្មណ៍ពីក្រុម Barcelona និង AC Milan នាពេលថ្មីៗ តែការផ្លាស់ទៅ Real Madrid អាចនឹងមានភាគរយច្រើនជាង។ នេះយោងតាម Daily Mail។
ការដែលចាមអារម្មណ៍ដោយសារតែ Madrid មើលឃើញថា Luiz ជាកីឡាករល្អអាចលេងបានទាំងខ្សែការពារកណ្ដាល និងបម្រើការពារ ដូច្នេះគេអាចមានឥទ្ធិពលខ្លាំងនៅតំបន់ខាងក្រោម។
David Luiz បានត្រលប់មក Chelsea វិញ បន្ទាប់ផ្លាស់ពីក្លឹប Paris Saint-Germain ក្នុងតម្លៃខ្លួន៣៤លានផោន ហើយរដូវកាលមុនគេក៏ជាប់ជាកីឡាករ១១នាក់ល្អរបស់ Premier League ក្រោយជួយតោខៀវលើកពាន៕