បាល់ទាត់៖ បន្ទាប់ពីបណ្ដេញគ្រូបង្វឹកលោក Edgardo Bauza ចេញពីតំណែងកាលពីសប្ដាហ៍មុន នៅពេលនេះសហព័ន្ធបាល់ទាត់អារ៉ាប៊ីសាអ៊ូឌី រកឃើញគ្រូបង្វឹកក្រុមជម្រើសជាតិថ្មីហើយគឺអតីតគ្រូបង្វឹកឈីលីលោក Juan Antonio Pizzi។
បុរសវ័យ 49ឆ្នាំអាហ្សង់ទីនរូបនេះ នឹងត្រូវបានបង្ហាញខ្លួននៅថ្ងៃសុក្រនេះនៅទីក្រុង Moscow ប្រទេសរុស្ស៊ីក្នុងពិធីចាប់ឆ្នោតបែងចែកពូលផ្លូវការសំរាប់ World Cup 2018។ លោក Antonio Pizzi បានក្លាយជាគ្រូបង្វឹកទីបីហើយ ដែលមកកាន់តំណែងគ្រូបង្វឹកអារ៉ាប៊ីសាអ៊ូឌីក្នុងរយៈពេល 3ខែចុងក្រោយនេះ បន្ទាប់ពីលោក Edgardo Bauza ជំនួសតំណែងលោក Bert van Marwijk ដែលបានដឹកនាំក្រុមឆ្លងផុតវគ្គជម្រុះឆ្ពោះទៅ World Cup លើកដំបូងរាប់ពីឆ្នាំ2006។ លោក Van Marwijk ក្រោយមកក៏លាលែងពីតំណែង បន្ទាប់ពីចរចាកិច្ចសន្យាថ្មីមិនត្រូវគ្នាជាមួយសហព័ន្ធបាល់ទាត់អារ៉ាប៊ីសាអ៊ូឌី មុនពេលដែល Bauza មកជំនួសតំណែងហើយក៏ត្រូវបណ្ដេញចេញក្រោយដឹកនាំបន្តបានតែ 5ប្រកួត។
ដោយឡែកលោក Juan Antonio Pizzi ចុងក្រោយបំផុតលោកបានដឹកនាំក្រុមជម្រើសជាតិឈីលី តែលោកក៏បានលាលែងពីតំណែង ក្រោយដឹកនាំក្រុមឈីលីទៅ World Cup មិនបាន។ សូមបញ្ជាក់ថា អារ៉ាប៊ីសាអ៊ូឌី នឹងបង្ហាញខ្លួននៅ World Cup លើកទី5 តែវត្តមានជោគជ័យបំផុតរបស់ពួកគេ គឺការបង្ហាញខ្លួនដំបូងកាលពីឆ្នាំ1994 នៅសហរដ្ឋអាមេរិក ជាពេលដែលអារ៉ាប៊ីសាអ៊ូឌីឡើងដល់វគ្គ 16ក្រុមចុងក្រោយ។ បន្តបន្ទាប់មកក្រុមបាល់ទាត់នៅតំបន់មជ្ឈិមបូព៌ាមួយនេះ ឆ្លងមិនផុតវគ្គវិលជុំក្នុងពូលឡើយ៕
អត្ថបទ៖នាង សុភាវុធ Via: BTV News
