Manuel Lanzini ត្រូវពិន័យដោយសហព័ន្ធបាល់ទាត់អង់គ្លេសហៅកាត់ថា FA សម្រាប់ការធ្វើពុតដួល (Diving) ក្នុងការប្រកួត Premier League ទល់នឹង Stoke។
ខ្សែបម្រើសញ្ជាតិអាហ្សង់ទីនបានដួលក្នុងប្រអប់ពេលប្រជែងគ្នាជាមួយកីឡាករ Erik Pieters ហើយភ្លាមនោះអាជ្ញាកណ្ដាលបានផ្ដល់បាល់ប៉េណាល់ទីឲ្យ West Ham ស៊ុតនាំមុខ ១-០ ក្នុងជំនួបដែលពួកគេឈ្នះ ៣-០។ Lanzini មានពេលត្រឹមម៉ោង៦ល្ងាច (ម៉ោងអង់គ្លេស) ថ្ងៃអង្គារនេះដើម្បីប្ដឹងតវ៉ា។
ការពិន័យគឺសម្រេចដោយអ្នកជំនាញឯករាជ្យ៣នាក់របស់ FA ហើយបើគ្រប់យ៉ាងមិនប្រែប្រួលទេ Lanzini នឹងអវត្តមាន ២ប្រកួតបន្ទាប់របស់ West Ham រួមមាន ប៉ះ Arsenal នៅ League Cup និង ប៉ះ Newcastle នៅ Premier League។
ខ្សែប្រយុទ្ធ Oumar Niasse របស់ Everton គឺជាកីឡាករដំបូងដែលត្រូវ FA ពិន័យចំពោះបទល្មើសដូចគ្នានេះ បន្ទាប់ពីធ្វើពុតដួលពេលប្រជែងជាមួយ Scott Dann ក្នុងការប្រកួតដែលស្មើគ្នា ១-១ ជាមួយ Crystal Palace។
គួររម្លឹកថា FA បានបង្កើតច្បាប់ថ្មីមួយដាក់ពិន័យដល់កីឡាករណាដែលធ្វើពុតដួលបន្លំភ្នែកអាជ្ញាកណ្ដាល អំឡុងពេលប្រកួត ដែលច្បាប់នេះប្រកាសឲ្យប្រើចាប់ពីរដូវកាល២០១៧-១៨តទៅ៕
ប្រភព៖ Independent ប្រែសម្រួល៖ វីរ៉ុត