សហព័ន្ធកីឡាបាល់ទាត់កម្ពុជា បានសម្រេចបើកឲ្យមានការប្រកួតជម្រើសជើងឯកលីគទី២ ឡើងវិញ នៅក្នុងឆ្នាំ២០២០នេះ ក្រោយពីក្របខ័ណ្ឌលំដាប់ទី២ បន្ទាប់ពីលីកកំពូលកម្ពុជា មួយនេះ ត្រូវបានផ្អាក ឬអត់មានសកម្មភាពអស់រយៈពេល៣ឆ្នាំកន្លងមកនេះ។
ការមិនរៀបចំឲ្យមានការប្រកួតលីគទី២ អស់រយៈពេល៣ឆ្នាំកន្លងមកនេះ បានធ្វើឲ្យការជ្រើសរើសក្រុមចំនួន២ សម្រាប់ឡើងទៅលេងនៅលីកកំពូលកម្ពុជា ត្រូវបានជាប់គាំង ឬធ្វើឡើង ដោយគ្មានរចនាសម្ព័ន្ធច្បាស់លាស់ ព្រោះតាមគោលការណ៍កន្លងមក គឺក្រុមទទួលបានលេខ១ និងលេខ២ ត្រូវឡើងទៅលេងនៅលីកកំពូលកម្ពុជា ជំនួសក្រុមបាតតារាងទាំង២ ដែលត្រូវបានកាត់ចេញ។
យ៉ាងណាក៏ដោយ តាមសេចក្តីជូនដំណដឹងរបស់សហព័ន្ធកីឡាបាល់ទាត់កម្ពុជា ដែលត្រូវបានចែកចាយ នៅថ្ងៃអង្គារនេះ បានបញ្ជាក់ថា សហព័ន្ធ នឹងរៀបចំឲ្យមានការប្រកួតលីគទី២ ជាថ្មីវិញ ដែលគ្រោងនឹងធ្វើពីថ្ងៃទី៣ ខែតុលា ដល់ថ្ងៃទី១៩ ខែធ្នូ ឆ្នាំ២០២០ ហើយចាប់ទទួលពាក្យក្រុមចូលរួមពីពេលនេះទៅ រហូតដល់ថ្ងៃទី៣១ ខែសីហា។
ជាមួយគ្នា សហព័ន្ធកីឡាបាល់ទាត់កម្ពុជា ក៏បានបង្ហាញកម្មវិធីប្រកួតចំនួន៥ទៀត ដែលនឹងចាប់ដំណើរការពីឆ្នាំ២០២០នេះតទៅផងដែរ ក្នុងនោះមានការប្រកួតពានរង្វាន់ក្នុងសាលថ្នាក់ជាតិ, ជម្រើសជើងឯកបាល់ទាត់នារី(លីគ), ជម្រើសរើសជើងឯកបាល់ទាត់នារីអាយុក្រោម១៥ឆ្នាំ, ពានរង្វាន់បាល់ទាត់យុវជនយុវជនអាយុក្រោម១៨ឆ្នាំ និងពានរង្វាន់បាល់ទាត់យុវជនអាយុក្រោម១៥ឆ្នាំ។
ចំពោះការរៀបចំឲ្យមានព្រឹត្តិការណ៍ទាំងនេះ ត្រូវបានសហព័ន្ធកីឡាបាល់ទាត់កម្ពុជា បញ្ជាក់ថា គឺជាការអនុវត្តផែនការកែទម្រង់អភិវឌ្ឍន៍កីឡាបាល់ទាត់កម្ពុជា ឆ្ពោះទៅកាន់ការប្រកួតកីឡាស៊ីហ្គេម ឆ្នាំ២០២៣ ដែលកម្ពុជា នឹងត្រូវធ្វើជាម្ចាស់ផ្ទះ ជាប្រវត្តិសាស្រ្ត លើកដំបូង៕
