សហព័ន្ធប្រដាល់គុនខ្មែរគ្រោងនឹងបង្កើតឲ្យមានមជ្ឈមណ្ឌលហ្វឹកហ្វឺនមួយមុនគេនៅខេត្តបន្ទាយមានជ័យនៅពេលខាងមុខងាយស្រួលកីឡាករ កីឡាការិនីក្នុងខេត្តនោះ ឬខេត្តបាត់ដំបងអាចទៅហាត់បាន។
លោក តែម ម៉ឺន ប្រធានសហព័ន្ធប្រដាល់គុនខ្មែរបានឲ្យដឹងថា យោងតាមទិសដៅឆ្នាំ២០១៨ ដែលបានដាក់មកនេះ ជាការពង្រីកបន្ថែមក្នុងវិស័យកីឡាមួយនេះផង ហើយក៏ជាការលើកទឹកចិត្តដល់ម្ចាស់មេដាយមាសស៊ីហ្គេមដំបូងគេ ឃីម ឌីម៉ា ផងដែរ។
ប្រធានសហព័ន្ធរូបនេះបន្ថែមទៀតថា ក្នុងចំណោមខេត្តដែលជាប់ៗគ្នាក្នុងតំបន់នោះត្រូវតែធ្វើក្នុងខេត្តបន្ទាយមានជ័យមួយនេះមុនគេ ដើម្បីងាយស្រួលសម្រាប់យុវជនថ្នាលធ្វើការហ្វឹកហាត់ ដូចជាខេត្តបាត់ដំបងក៏អាចមកចូលរួមហ្វឹកហាត់នៅទីនោះបានដែរ ទម្រាំដល់ពេលបង្កើតបន្ថែមនៅក្នុងខេត្តរបស់ពួកគេ។
ការលើកឡើងរបស់ប្រធានសហព័ន្ធគុនខ្មែរលោក តែម ម៉ឺន ខាងលើនេះក្នុងពិធីមហាសន្និបាតបូកសរុបការងារឆ្នាំចាស់ ការដាក់ទិសដៅសម្រាប់ឆ្នាំ២០១៨ និងបោះឆ្នោតជ្រើសរើសគណៈកម្មាធិការប្រតិបត្តិជំនួសអ្នកចាស់ដែលបាត់បង់ជីវិត ធ្វើឡើងកាលពីព្រឹកថ្ងៃទី២៣ ខែធ្នូ នៅឯពហុកីឡដ្ឋានជាតិ៕
ព័ត៌មានអំពីប្រដាល់
ព័ត៌មានអំពីព័ត៌មានជាតិ
ព័ត៌មានអំពីកីឡាអន្តរជាតិ