ការប្រកួត TV5 Knock Out Series By Kcement នឹងបើកការប្រកួតវគ្គ ៤នាក់ចុងក្រោយថ្ងៃសៅរ៍ ទី៣០ ខែធ្នូ ឆ្នាំ២០១៧ សប្ដាហ៍នេះ ខណៈការប្រកួតកាលពីថ្ងៃសៅរ៍ ទី២៣ ខែធ្នូ ជាជំនួបមិត្តភាព។
សម្រាប់លទ្ធផលកាលពីថ្ងៃសៅរ៍ ទី២៣ ខែធ្នូ ឆ្នាំ២០១៧ មាន រឿម វណ្ណៈ បានយកឈ្នះ ភុន សោភ័ណ្ឌ ដោយពិន្ទុ ផាន់ ប៊ុនរ៉ុង យកឈ្នះ ឡុង ខេត្ត ជាគូបើកឆាក ជាមួយគ្នានោះ ប្រាក់ ស៊ីណាត ចាញ់ពិន្ទុ សៅ ប៊ុនធឿន និងផុន ផាន់ណា ស្មើកីឡាករថៃ Oreno ។
ចំណែកការប្រកួតដណ្ដើមពានរង្វាន់ TV5 Knock Out Series By Kcement ដែលមានប្រាក់ ៤ ពាន់ដុល្លារបានរកឃើញបេក្ខភាពចំនួន ៤រូបចុងក្រោយហើយគឺមាន សៅ វណ្ណា, អ៊ុំ វណ្ណេត, គឹម វាសនា និង ង៉ែត្រ រដ្ឋា។
ការប្រកួត TV5 Boxing Knock Out Series នៅសង្វៀនប្រដាល់ប៉ុស្តិ៍លេខ៥ មានកីឡាករចូលរួមចំនួន៣២នាក់ ប្រកួតជម្រុះរហូតដល់រកឃើញម្ចាស់ពានរង្វាន់តែម្ដង ហើយការប្រកួតនេះកីឡាកររូបណាចាញ់ត្រូវធ្លាក់តែម្ដង ដោយមិនមានប្រកួតសន្សំពិន្ទុនោះទេ។ ដោយការប្រកួតទៀតសោតធ្វើឡើងត្រឹម៣ទឹកទេ។
សម្រាប់អ្នកទទួលបានលេខ១វិញ នឹងទទួលបានប្រាក់៤ពាន់ដុល្លារ អមជាមួយពាន១ លេខ២ទទួលបាន២ពាន់ដុល្លារ លេខ៣ទទួលបាន៧៣០ដុល្លារ និងលេខ៤ទទួលបាន៥០០ដុល្លារ៕