ក្រុមក្រសួងការពារជាតិ បានបង្ហាញសមត្ថភាពរបស់ខ្លួន ដោយអាចយកឈ្នះក្រុមណាហ្គាវើល និងព្រះខ័នរាជស្វាយរៀងបាន នៅវគ្គ Play-off ឡើងទៅប៉ះក្រុមបឹងកេតនៅវគ្គផ្ដាច់ព្រ័ត្រ ពានរង្វាន់លីគកំពូលកម្ពុជា។
តើអ្វីទៅជាចំណុចពិសេសរបស់ទ័ព ដែលអាចយកឈ្នះក្រុមខ្លាំងៗនៅកម្ពុជាបានយ៉ាងនេះ? លោក ភា សុភ័ត្រា គ្រូជំនួយក្លឹបក្រសួងការពារជាតិបានបង្ហើប៣ចំណុចនេះ៖
១. ធ្លាប់ចាញ់ ដូចនេះឈឺចាប់ ហើយប្រឹងកាន់តែខ្លាំង
កាលលេងសន្សំពិន្ទុ ក្រុមក្រសួងការពារជាតិសុទ្ធតែធ្លាប់បរាជ័យក្រោមថ្វីជើងរបស់ណាហ្គាវើល និងព្រះខ័នរាជស្វាយរៀង ទាំងអស់។ ដូច្នេះហើយនេះអាចជាកត្តាមួយដែលធ្វើឱ្យកីឡាករទាំងអស់ចង់ឈ្នះវិញ ដើម្បីជាការសងសឹកក៏ថាបាន។
២. បន្សល់ការសាមគ្គី និងបង្កើនទ្វេដងបន្ទាប់ពីប្រកួតនៅចិន
មុនលេងវគ្គ Play-off នេះ ក្រុមក្រសួងការពារជាតិបានទៅប្រកួតមិត្តភាពជាមួយក្រុមនៅប្រទេសចិន ដោយគ្រានោះពួកគេបានទៅប្រកួតជាច្រើនប្រកួតជាមួយក្រុមផ្សេងៗ ហើយលទ្ធផលក៏ទទួលបានល្អផងដែរ បើទោះជាមិនឈ្នះពាននៅចិននោះក៏ដោយ។ កត្តានេះហើយ ទើបបានជាលោក ភា សុភ័ត្រា មើលឃើញថាវាបានបន្សល់ទុកនៅការសាមគ្គីជាក្រុមបានល្អ។
៣. ចំណុចខ្សោយ ឬការបង្កើតកំហុស (errors) ត្រូវបានកែតម្រូវយ៉ាងគំហុក
ក្រុមក្រសួងការពារជាតិមានពេលហ្វឹកហាត់បានគ្រប់គ្រាន់ ជាពិសេសបានទៅលេងប្រកួតមិត្តភាពនៅចិនថែមទៀតនោះ បានធ្វើឱ្យពួកគេបានកែប្រែនៅកំហុសបានច្រើន។ តួយ៉ាងដូចជាការលេងបាត់បាល់នៅតំបន់កណ្ដាល ក៏ពួកគេបានកែប្រែរួចរាល់ហើយដែរ។ ដូច្នេះហើយ ទើបបានជាក្រុមទទួលបានលទ្ធផលល្អ អាចឡើងដល់វគ្គផ្ដាច់ព្រ័ត្រប៉ះជាមួយបឹងកេតបាន៕