ក្រោយពីវាយដៃគូឱ្យសន្លប់ជាញឹកញាប់កាលពីពេលកន្លងទៅនេះ ធឿន ធារ៉ា កំពុងទទួលការចាប់អារម្មណ៍ខ្លាំងមែនទែនទាំងនៅកម្ពុជា និងប្រទេសថៃ។
តួយ៉ាងដូចជាថ្ងៃទី៣១ចុងឆ្នាំនេះ កីឡាករមាឌធំ កែងល្អ ម្នាក់នេះនឹងត្រូវប្រកួតជាមួយកីឡាករថៃ ក្នុងគូឯកតែម្ដងនាកម្មវិធី Max Muay Thai ដែលធ្វើឡើងនៅ ផាតាយ៉ា។ កីឡាករវ័យក្មេងរូបនេះ បានទៅហាត់នៅប្រទេសថៃជាច្រើនឆ្នាំ និងសាងភាពល្បីល្បាញរបស់ខ្លួននៅសង្វៀន Max Muay Thai តាំងពីគូអមការប្រកួតរហូតដល់គូឯកនេះ ដោយរាប់ត្រួសៗទៅ ៥ដងកន្លងមកមិនទាន់ស្គាល់ទេ ពាក្យថាចាញ់។
អ្វីដែលកាន់តែពិសេសទៀតនោះ អ្នកប្រដាល់កាយសម្បទាល្អម្នាក់នេះបានយកឈ្នះលើសិស្សច្បងល្បីខ្លាំងនៅកម្ពុជា រឿង សោភ័ណ្ឌ បានថែមទៀតផងពេលប្រកួតកីឡាប្រដាល់ថ្នាក់ជាតិកន្លងទៅ។ លើសពីនេះទៅទៀត រូបគេក៏ត្រូវបានប្រធានសហព័ន្ធកីឡាប្រដាល់ លោក តែម ម៉ឺន សរសើរថាជាអ្នកចម្បាំងកម្ពុជាមានគ្រប់ក្បាច់ ល្អគ្រប់គ្រឿង ជាទំពាំងល្អសម្រាប់កម្ពុជានាពេលអនាគត៕
អត្ថបទ៖ មុន្នីរម្យ