លោក អ៊ុក យ៉ារី គ្រូបង្គោលក្រុមយុវជនកីឡាប៉េតង់កម្ពុជា ហាក់មានការរំពឹងខ្ពស់ទៅលើកូនសិស្សទាំង ៤នាក់របស់ខ្លួនថា អាចនឹងដណ្តើមបានមេដាយពីការប្រកួតកីឡាប៉េតង់តង់ជើងឯកពិភពលោក ដែលនឹងចាប់ផ្តើមពីថ្ងៃទី៤ ដល់ទី៨ ខែវិច្ឆិកា នៅប្រទេសចិន។
អ៊ុក យ៉ារី បានប្រាប់ មុនពេលធ្វើដំណើរទៅប្រទេសចិន កាលពីយប់ថ្ងៃពុធថា៖ «យើងមានសង្ឃឹមច្រើន ក្នុងឈានទៅរកការឈ្នះបានមេដាយ ព្រោះតាមការហ្វឹកហាត់កន្លងមកនេះ ឃើញថាសមត្ថភាពកីឡាករទាំង ៤នាក់របស់យើង មានការរីកចម្រើនស្មើដៃគ្នាតែម្តង គឺខុសពីការចេញទៅប្រកួត កាលពីឆ្នាំ២០១៥ ដែលការហ្វឹកហាត់បានតិចតួច»។
គួររំឭកថា សហព័ន្ធកីឡាប៊ូល និងប៉េតង់កម្ពុជា ធ្លាប់បានបញ្ចូនក្រុមយុវជន ឲ្យទៅចូលរួមការប្រកួតកីឡាប៉េតង់ជើងឯកពិភពលោក ជាលើកទី១ នៅប្រទេសថៃ កាលពីឆ្នាំ២០១៥ ប៉ុន្តែក្រុមកម្ពុជា បានធ្លាក់នៅក្នុងវគ្គ១/៤ផ្តាច់ព្រ័ត្រ ឬវគ្គ៨ក្រុមចុងក្រោយគួរឲ្យសោកស្តាយ។
ចំណែកកីឡាករជាយុវជនទាំង៤នាក់ ចេញទៅប្រកួតលើកនេះ សុទ្ធតែអ្នកថ្មី ព្រោះអត្តពលិកទាំង៤នាក់ ដែលបានទៅចូលរួមកាលពីឆ្នាំ២០១៥នោះ ខ្លះលើសអាយុ ហើយខ្លះទៀតក៏កាត់ចូលក្នុងក្រុមធំជម្រើសជាតិកីឡាប៉េតង់។
យ៉ាងណាក៏ដោយ លោក អ៊ុក យ៉ារី បាននិយាយបែបប្រៀបធៀបថា៖«ក្រុមយុវជនចេញទៅប្រកួតលើកនេះ គឺសមត្ថភាពនៃការហ្វឹកហាត់របស់ពួកគេ មានការកើនឡើងជាងមុនពី៧០ទៅ៨០ភាគរយ ហើយការកើនឡើងនេះ គឺកើនទាំងការប្រកួតជាក្រុម និងការវាយយកពិន្ទុ ហេតុនេះយើងរំពឹងខ្ពស់ ក្នុងការឈានទៅរកការឈ្នះបានមេដាយ ដ្បិតអីប្រទេស ដែលជារានាំងរបស់យើង មានតែ៣ទេ គឺនៅអាស៊ី មានថៃ ហើយនៅអឺរ៉ុបមានបារាំង និងប្រទេសម៉ាណាកាស្កា»។
សម្រាប់ការប្រកួតដែលមានប្រទេសចូលរួមប្រមាណ៤០នេះ កីឡាករជាយុវជន ឃួន លីហ៊ ត្រូវប្រកួតវាយយកពិន្ទុ ហើយរូបគេ នឹងត្រូវប្រកួតវិញ្ញាសាជាក្រុមជាមួយកីឡាករ កុយ សុភក្រ្តា, ភាត រ៉ាឃីម និង កៅ ភក្តី ផងដែរ ខណៈការចេញទៅប្រកួតក្រៅប្រទេសកន្លងមក ឃួន លីហ៊, កុយ សុភក្រ្តា និង កៅ ភក្តី ធ្លាប់ឈ្នះមេដាយប្រាក់ វិញ្ញាសា៣នាក់ទល់៣នាក់ ក្នុងការប្រកួតជើងឯកអាស៊ី នៅមីយ៉ាន់ម៉ា កាលពីឆ្នាំ២០១៦ ហើយ ឃួន លីហ៊ និង កៅ ភក្តី ក៏ធ្លាប់ឈ្នះមេដាយមាស ការប្រកួតជើងឯកអាស៊ាន នៅឡាវ ឆ្នាំ២០១៦ ដែរ រីឯ ភាត រ៉ាឃីម មិនធ្លាប់បានទៅប្រកួតនៅក្រៅប្រទេសពីមុនមកទេ ប៉ុន្តែនៅក្នុងឆ្នាំ២០១៧នេះ គេមានការរីកចម្រើនខ្លាំង។
