លោកនាយករដ្ឋមន្រ្តី ហ៊ុន សែន បានសម្តែងការអបអរ និងកោតសរសើរទៅដល់វីរកីឡាការិនី កែ ឡេង និង អ៊ុក ស្រីមុំ ដែលបានរួមគ្នាបំបែកឯតទគ្គកម្មពិភពលោក តាមរយៈការដណ្តើមបានមេដាយមាសជើងឯកពិភពលោក លើវិញ្ញាសាវាយយកពិន្ទុ ចំនួន៥ជំនាន់ជាប់ៗគ្នា។
លោក ហ៊ុន សែន បានថ្លែងថា៖ «ក្នុងនាមឱ្យរាជរដ្ឋាភិបាលនៃព្រះរាជណាចក្រកម្ពុជា ខ្ញុំសូមអបអរដល់កីឡាការិនី អ៊ុក ស្រីមុំ និងលោកស្រី កែ ឡេង។ មុននេះ ឯកឧត្តម ហង់ជួន ណារ៉ុន បានធ្វើរបាយការណ៍ ពាក់ព័ន្ធនឹងការដណ្តើមបានមេដាយថ្មីៗបន្ថែមទៀត នៅមេដាយមាស សម្រាប់កីឡាប៊ូល និងប៉េតង់ ដែលអាចចាត់ទុកថា ជាការបំបែកនូវឯតទគ្គកម្ម សម្រាប់ពិភពលោក ដោយសារតែយើងទទួលបានមេដាយមាសផ្នែកប៊ូលនេះ តជំនាន់ រហូតដល់៥ជំនាន់»។
ប្រមុខដឹកនាំប្រទេសរូបនេះ បានបន្តថា៖ «វីរកីឡាការិនី កែ ឡេង ដណ្តើមបានមេដាយមាសបាន៤ជំនាន់ ឥឡូវនេះមកដល់កីឡាការិនី អ៊ុក ស្រីមុំ បាន១ជំនាន់ទៀត គ្រប់៥ជំនាន់ ហើយវាហាក់បីដូចជាមានភាពចម្លែកបន្តិច សម្រាប់កីឡាប៊ូល ដែលបង្កើតឡើងនៅប្រទេសប៉ែនអឺរ៉ុប ជាពិសេសប្រទេសបារាំង ប៉ុន្តែបើយើងពិនិត្យទៅលើសារបាននៃការប្រកួត នៅវគ្គផ្តាច់ព្រ័ត្រ បែរជាអ្នកនៅអាស៊ី ដូចជាកីឡាការិនី អ៊ុក ស្រីមុំ ប្រកួតជាមួយកីឡាការិនីរបស់ថៃ អ៊ីចឹងតើអឺរ៉ុប នៅតែជាអ្នកខ្លាំងផ្នែកកីឡាប៊ូលតទៅទៀត ឬក៏ពួកអាស៊ី ក្លាយទៅជាអ្នកខ្លាំង សម្រាប់កីឡាប៊ូលនេះ?»។
ការលើកឡើងបែបនេះ របស់លោកនាយករដ្ឋមន្រ្តី នៅពេលលោកបានចូលរួមជាអធិតីភាព នៅពិធីប្រគល់ប្រាក់រង្វាន់លើកទឹកចិត្ត ដល់វីរកីឡាការិនី អ៊ុក ស្រីមុំ ដែលទើបបានឈ្នះមេដាយមាសជើងឯកពិភពលោក កាលពីចុងឆ្នាំ២០២១ កាលពីព្រឹកថ្ងៃពុធនេះ នៅវិមានសន្តិភាព។
លោក ហ៊ុន សែន បានប្រកាសផ្ដល់ប្រាក់រង្វាន់របស់រាជរដ្ឋាភិបាល តាមរយៈក្រសួងអប់រំ យុវជន និងកីឡា ដល់វីរកីឡាការិនី អ៊ុក ស្រីមុំ ចំនួន ៤០លានរៀល ហើយខ្លួនលោកផ្ទាល់ និងលោកស្រីកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ក៏បានឧបត្ថម្ភថវិកាចំនួន ១ម៉ឺនដុល្លារផងដែរ ដូច្នេះ វីរកីឡាការិនី អ៊ុក ស្រីមុំ ទទួលបានប្រាក់រង្វាន់សរុបចំនួន ២ម៉ឺនដុល្លារអាមេរិក។
ចំណែកលោក សុខ ម៉ុង ដែលជាគ្រូបង្វឹកក្រុមជម្រើសជាតិកីឡាប៉េតង់កម្ពុជា (ផ្នែកនារី) ក៏ទទួលបានប្រាក់រង្វាន់លើកទឹកចិត្តចំនួន ៤០លានរៀល ពីរាជរដ្ឋាភិបាល តាមរយៈក្រសួងអប់រំ យុវជន និងកីឡា ព្រមទាំងទទួលបានការឧបត្ថម្ភថវិកាផ្ទាល់របស់លោកនាយករដ្ឋមន្រ្តី និងលោកស្រី កិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ចំនួន ៥០០០ដុល្លារអាមេរិក ផងដែរ៕
