ដើម្បីចូលរួមចំណែកអភិវឌ្ឍធនធានកីឡាករកីឡាការិនីប៉េតង់ឲ្យកាន់តែសម្បូរបែប ថ្នាក់ដឹកនាំសហព័ន្ធកីឡាប៊ូល និងប៉េតង់កម្ពុជាប្តេជ្ញាជួយសាងសង់ទីលានឲ្យបានយ៉ាងតិច៤តារាងក្នុងខេត្តនីមួយៗ នៅឆ្នាំ២០២២នេះ។ ជាមួយគ្នានេះថ្នាក់ដឹកនាំ ស្នើឲ្យសម្ព័ន្ធ ឬក្លិបនៅតាមខេត្តនីមួយៗ ត្រូវមានការឯកភាពផ្ទៃក្នុង និងធ្វើសំណើរមកសហព័ន្ធឲ្យបានត្រឹមត្រូវ បើពុំនោះទេ សហព័ន្ធមិនសាងសង់ទីលានឲ្យឡើយ។ ទន្ទឹមនឹងនេះ សហព័ន្ធ ក៏បានបង្ហាញពីផែនក្នុងការបញ្ជូនគ្រូបង្វឹកនិងមន្ត្រីបច្ចេកទេសរបស់សហព័ន្ធទៅបណ្តុះបណ្តាលបច្ចេកដល់សម្ព័ន្ធ និងក្លិបនៅតាមខេត្តនីមួយៗផងដែរ។
នាពិធីបិទសន្និបាតបូកសរុបការងារក្នុងឆ្នាំ២០២១ និងលើកទិសដៅអនុវត្តសម្រាប់ឆ្នាំ២០២២ លោក ស សុខា ប្រធានសហព័ន្ធកីឡាប៊ូល និងប៉េតង់កម្ពុជាប្តេជ្ញានឹងជួយសាងសង់ទីលានប៉េតង់ឲ្យខេត្តនីមួយៗ ឲ្យបានយ៉ាងតិចចំនួន៤នៅឆ្នាំ២០២២ដោយសរុបទាំង២៥រាជធានីខេត្តមានចំនួន១០០ទីលាន។ គោលបំណងនៃការសាងសង់ទីលាននេះ គឺដើម្បីចូលរួមចំណែកអភិវឌ្ឍន៍សមត្ថភាពកីឡាករនៅតាមខេត្តឲ្យកាន់តែសម្បូរបែប សម្រាប់ចម្រាញ់ត្រៀមការប្រកួតនានា ពិសេសស៊ីហ្គេមនា ឆ្នាំ២០២៣ ដែលកម្ពុជាធ្វើជាម្ចាស់ផ្ទះ។
ទន្ទឹមនឹងនេះ លោក បានស្នើឲ្យសម្ព័ន្ធ ឬក្លិបនៅតាមរាជធានី-ខេត្តនីមួយៗត្រូវដាក់ពាក្យស្នើសុំមកកាន់សហព័ន្ធឲ្យបានត្រឹមត្រូវ និងត្រូវមានការឯកភាពផ្ទៃក្នុងជាមុនសិន ដើម្បីជៀសវាងកុំឲ្យមានការដណ្តើមគ្នាឲ្យសាងសង់នៅទីនេះ ឬទីនោះរវាងសម្ព័ន្ធ ឬក្លិបនីមួយៗ។ លោកអះអាងថា សហព័ន្ធ នឹងមិនសាងសង់ទីលានឲ្យសម្ព័ន្ធ ឬក្លិបឡើយ បើគ្មានសំណើរត្រឹមត្រូវ និងគ្មានការឯកភាពផ្ទៃក្នុង។
លោក ស សុខា បានប្តេជ្ញាដូច្នេះថា៖ «ខ្ញុំតាំងចិត្តថា ក្នុងមួយឆ្នាំនេះ នឹងធ្វើឲ្យបានយ៉ាងតិច៤តារាង ក្នុងខេត្តនីមួយៗ បើបូកសរុបទៅ២៥រាជធានីប្រហែលជាខ្ទង់១០០តារាង។ ប៉ុន្តែសុំឲ្យមានការស្នើសុំពីសម្ព័ន្ធ ឬក្លិបរបស់ខេត្តនីមួយៗមកកាន់សហព័ន្ធ ហើយខ្ញុំសន្យាថា នឹងពិនិត្យ និងសម្រេច ហើយទីតាំងយើងជ្រើសរើសខ្លួនឯង។ អ៊ីចឹងបើ១ឆ្នាំបាន៤ក្នុង១ខេត្ត ខ្ញុំគិតថាតែពីរបីឆ្នាំវាឡើង១០ទៅ២០តារាង។ តែសូមឲ្យមានការឯកភាពផ្ទៃក្នុងសិន កុំឲ្យមួយដណ្តើមដាក់កន្លែងនេះ មួយដណ្តើមដាក់កន្លែងនោះ ដល់ទីបញ្ចប់ធ្វើលេងចេញ»។
ពាក់ព័ន្ធការអភិវឌ្ឍន៍ធនធាននៅតាមបណ្តាខេត្តនេះ លោក ស សុខា បានគូសបញ្ជាក់ថា សហព័ន្ធនឹងបញ្ជូនមន្ត្រីបច្ចេកទេស និងគ្រូបង្វឹករបស់សហព័ន្ធ ទៅបណ្តុះបណ្តាលកីឡាករកីឡាការិនីនៅតាមខេត្តនីមួយៗ ដើម្បីឲ្យពួកគេទទួលបានបច្ចេកទេស និងបទពិសោធថ្មីៗ សម្រាប់អភិវឌ្ឍន៍សមត្ថភាពឲ្យកាន់តែប្រសើរថែមទៀត។ បន្ថែមលើនេះ លោកអះអាងថា នៅឆ្នាំ២០២២ នេះ សហព័ន្ធ នឹងរៀបចំការប្រកួតធំៗឡើងវិញ ដើម្បីឲ្យកីឡាករបានចូលរួមប្រកួតប្រជែង បង្ហាញទេពកោសល្យ និងអភិវឌ្ឍន៍សមត្ថភាព ដើម្បីត្រៀមចូលរួមប្រកួតកីឡាស៊ីហ្គេម នៅវៀតណាមនៅឆ្នាំនេះ និងការប្រកួតស៊ីហ្គេមនៅឆ្នាំ២០២៣ ដែលកម្ពុជាធ្វើជាម្ចាស់ផ្ទះ។
ជាមួយគ្នានេះ សហព័ន្ធកីឡាប៊ូល និងប៉េតង់កម្ពុជា អាចចាត់ទុកជាសហព័ន្ធនាំមុខគេមួយនៅកម្ពុជាក្នុងការប្រជែង ដណ្តើមមេដាយលើឆាកអន្តរជាតិជូនជាតិ។ គិតមកទល់បច្ចុប្បន្ន សហព័ន្ធនេះ ដណ្តើមបានមេដាយអន្តរជាតិកម្រិតអាស៊ាន អាស៊ី និងពិភពលោកសរុបចំនួន៣៧០មេដាយ ក្នុងនោះមេដាយមាស ១០៨គ្រឿង ប្រាក់១៣១គ្រឿង និងសំរឹទ្ធ១៣១គ្រឿង៕
