មាន់គកបារាំង ត្រូវប្រឈមមុខជាមួយដាណឺម៉ាកនៅរាត្រីនេះ ដើម្បីកំណត់ពិតប្រាកដថានរណានឹងឈរកំពូលតារាងពូល C ខណៈអូស្ត្រាលីប៉ះប៉េរូ។
ក្រុមប្រកួតយប់នេះ
បារាំងបច្ចុប្បន្នកំពុងនៅឈរលេខ១ពូល C ឯដាណឺម៉ាកនៅលេខ២ ដូច្នេះក្រុមលោក Didier Deschamps ត្រូវការត្រឹមស្មើប៉ុណ្ណោះដើម្បីរក្សាកន្លែងរបស់ខ្លួន។ មុនការប្រកួតនេះមកដល់គ្រូរបស់ដាណឺម៉ាកបាននិយាយថា បារាំងត្រូវគេចាត់ទុកជាក្រុមអាចឈ្នះពាននិងមាន៦ពិន្ទុឈរកំពូលតារាង តែពួកគេមិនទាន់អស់គូប្រជែងទេ។ ពួកគេលេងល្អនៅប្រកួតមិត្តភាព តែនៅ World Cup មិនទាន់ឃើញល្អណាស់ណាទេ។
ចំណែកខ្សែបម្រើរបស់បារាំងកីឡាករ Corentin Tolisso ក៏បានថ្លែងដែរថា ក្រូអាតនឹងឈរលេខ១ពូល D ដូច្នេះក្រុមពួកគេមិនត្រូវបញ្ចប់នៅលេខ២ទេ ដើម្បីជៀសវាងការជួបគ្នា។ យ៉ាងណាគេក៏យល់ឃើញថា នីហ្សេរីយ៉ា អ៊ីស្លង់និងអាហ្សង់ទីនសុទ្ធតែជាក្រុមល្អដូចគ្នា។
ងាកទៅមើលពូល D ដែលត្រូវប្រកួតយប់នេះដូចគ្នា អាហ្សង់ទីនត្រូវឈ្នះនីហ្សេរីយ៉ាដាច់ខាត ហើយបន់ស្រន់ឲ្យអ៊ីស្លង់ចាញ់ក្រូអាត នោះពួកគេនឹងបានឡើងវគ្គ១៦ក្រុមចុងក្រោយនឹងគេហើយ៕
