ក្រុមជម្រើសជាតិក្រូអាតបានវាយបកយកលើក្រុមតោកំណាចអង់គ្លេសដើម្បីបង្កើតប្រវត្តិសាស្ត្រឡើងវគ្គផ្តាច់ព្រ័ត្រពានបាល់ទាត់ពិភពលោកឆ្នាំ២០១៨នេះ បន្ទាប់ពីឈ្នះដោយលទ្ធផល ២-១ រយៈពេល១២០នាទីក្នុងការប្រកួតវគ្គពាក់កណ្តាលផ្តាច់ព្រ័ត្រ។
វគ្គទី១ អង់គ្លេសបានប្រើពេលត្រឹមតែ៥នាទីប៉ុណ្ណោះដើម្បីបំបែកពងមាន់របស់ក្រូអាតដោយការទាត់បាល់ពិន័យហ្វ្រីឃីករបស់កីឡាករ Kieran Trippier បន្ទាប់ពីខ្សែការពាររបស់ក្រូអាតបង្កកំហុសលើខ្សែបម្រើ Lingard។ បន្ទាប់ពីគូប្រកួតនាំមុខ ក្រូអាតបានព្យាយាមសម្រុកមួយៗ និងបង្កើតឱកាសមួយលើកជាពីរលើកតែមិនបានសម្រេច ខណៈអង់គ្លេសប្រឹងការពារវាយបករហូតចប់វគ្គទីមួយ។
វគ្គទីពីរ ក្រូអាតបានបន្តដាក់សម្ពាធលើអង់គ្លេសដើម្បីព្យាយាមរកគ្រាប់បាល់តាមស្មើ។ ចំពោះការវាយសម្រុកមើលឃើញថា ក្រូអាតលេងដោយបច្ចេកទេស និងសន្សឹមៗឆ្ពោះទៅមុខទីរបស់អង់គ្លេស។ ក្តីរំភើបរីករាយរបស់ក្រូអាតបានកើតឡើងនៅពេល Ivan Perisic តែតចូលទីបានសម្រេចតាមរយៈ Sime Vrsaljko ជាអ្នកលើកបាល់ដើម្បីតាមស្មើ ១-១ នៅនាទី៦៨។ បន្ទាប់ពីតាមស្មើហើយ ក្រូអាតបានធ្វើឲ្យអង់គ្លេសព្រលឹងចុងសក់តាមរយៈការវាយសម្រុក និងទទួលឱកាសមាសស៊ុត ប៉ុន្តែបាល់ទៅបុករបាទី។ ចប់៩០នាទីស្មើគ្នា ១-១ ដែលតម្រូវថែមម៉ោង១៥នាទីពីរដង។
ការថែមម៉ោង១៥នាទីលើកទី១នៅតែគ្មានគ្រាប់បាល់ទម្លាយសំណាញ់ទីគ្នា បើទោះបីជាក្រុមទាំងពីរបានផ្លាស់ប្តូរកីឡាករថ្មីចូលដូចគ្នា។ ១៥នាទីចុងក្រោយទើបមានគ្រាប់បាល់កើតឡើង បន្ទាប់ពីក្រូអាតបានវាយសម្រុកដោយខ្សែប្រយុទ្ធ Manzukic បានក្លាយជាវីរបុរសឲ្យក្រូអាតក្នុងការស៊ុតចូលទីអង់គ្លេសនៅនាទី១០៩ដើម្បីក្រុមជម្រើសជាតិរបស់ខ្លួនឡើងវគ្គផ្តាច់ព្រ័ត្រជួបក្រុមមាន់គកបារាំង៕
Croatia vs England 2-1 Highlights 2018 World Cup
ក្រុមជម្រើសជាតិក្រូអាត សុី លើតោកំណាចអង់គ្លេស ២ទល់១ បង្កើតប្រវត្តិសាស្ត្រឡើងវគ្គផ្តាច់ព្រ័ត្រ(វិដេអូ)
អត្ថបទទាក់ទង