ក្លិប Fulham បានចុះហត្ថលេខាជាមួយនឹងខ្សែប្រយុទ្ធអន្តរជាតិអាល្លឺម៉ង់ Andre Schuerrle ក្នុងលក្ខខណ្ឌខ្ចីជើងរយៈពេល ២ឆ្នាំ ពីក្លិប Borussia Dortmund របស់ក្របខ័ណ្ឌ Bundesliga។ នេះបើយោងទៅតាមការបញ្ជាក់របស់ក្លិបស្ថិតក្នុងក្របខ័ណ្ឌ Premier League មួយនេះ។

ខ្សែប្រយុទ្ធវ័យ ២៧ឆ្នាំរូបនេះ ដែលជាសមាជិកឈ្នះពាន World Cup ឆ្នាំ២០១៤ ជាមួយនឹងអាល្លឺម៉ង់នោះ នឹងស្រេកឃ្លានក្នុងការជម្នះលើបញ្ហារបួស ដែលរូបគេបានជួបប្រទះក្នុងរយៈពេលប៉ុន្មានឆ្នាំចុងក្រោយនេះ ស្របពេលដែលរបួសសាច់ បានធ្វើឲ្យរូបគេបង្ហាញខ្លួនត្រឹមតែ ១៨ប្រកួតប៉ុណ្ណោះ​ ក្នុងក្របខ័ណ្ឌកំពូលរបស់អាល្លឺម៉ង់ កាលពីរដូវកាលមុន។ Schuerrle បានប្រាប់គេហទំព័ររបស់ក្លិបថា៖ «Fulham គឺជាក្លិបទី១ ដែលបានបង្ហាញពីការចាប់អារម្មណ៍លើខ្ញុំ ហើយនោះគឺជាអ្វីដែលខ្ញុំកោតសរសើរយ៉ាងខ្លាំង និងហេតុផលមួយក្នុងចំណោមហេតុផលដែលខ្ញុំចង់មកទីនេះ»។

ខ្សែប្រយុទ្ធរូបនេះបានបន្ថែមទៀតថា៖ «ខ្ញុំចូលចិត្តការគ្រប់គ្រងបាល់ ខ្ញុំចូលចិត្តការវាយសម្រុក ហើយខ្ញុំចូលចិត្តរត់ ហេតុនេះ ខ្ញុំគិតថា វាអាចនឹងក្លាយជារឿងដ៏ល្អ។ ខ្ញុំត្រូវតែប្រជែងយកកៅអីរបស់ខ្ញុំ ហើយខ្ញុំត្រូវតែបង្ហាញពីគុណភាពរបស់ខ្ញុំ ហេតុនេះ ខ្ញុំអាចជាសមាជិកម្នាក់ដែលជួយដល់ក្រុមនេះ»។ Fulham បានទិញចូលកីឡាករថ្មី ៤នាក់ មកទល់ពេលនេះ ខណៈដែលពួកគេត្រៀមបង្ហាញខ្លួនជាលើកទី១ របស់ពួកគេក្នុងក្របខ័ណ្ឌកំពូល ចាប់តាំងពីរដូវកាលឆ្នាំ២០១៣-២០១៤៕

ប្រភព៖ Reuters