នាយកគ្រប់គ្រង La Liga ប្រចាំតំបន់អាស៊ីអាគ្នេយ៍ បានមកទស្សនៈកិច្ចនៅកម្ពុជា កាលពីម្សិលមិញនេះ ហើយក៏បានបង្ហើបពីគម្រោងមួយដែលចង់ឱ្យកីឡាករកម្ពុជាមានឱកាសបានទៅហ្វឹកហាត់នៅអេស្ប៉ាញផងដែរ។
លោក Ivan Codina នាយកគ្រប់គ្រង La Liga ប្រចាំតំបន់អាស៊ីអាគ្នេយ៍ បានបញ្ជាក់ថាលោកបានតាមដានវិស័យបាល់ទាត់នៅកម្ពុជាច្រើនឆ្នាំមកហើយ។ ជាមួយការរីកចម្រើនពីមួយឆ្នាំទៅមួយឆ្នាំ លោកពិតជាចង់ឃើញកីឡាករកម្ពុជាមានឱកាសបានទទួលយកបទពិសោធនៅអេស្ប៉ាញខ្លាំងណាស់។ អ្វីដែលកាន់តែអស្ចារ្យថែមទៀតនោះ ក្រោយពីបានដឹងថាមានក្លឹបនៅអេស្ប៉ាញ ចង់ហៅកីឡាករកម្ពុជា២រូបទៅហ្វឹកហាត់កាលពីពេលកន្លងទៅនោះ លោករឹតតែមានឱ្យមានរឿងខាងលើនេះ កើតឡើងខ្លាំងមែនទែន។ លោក រួមជាមួយក្រុមការងារនឹងខិតខំបន្ថែមទៀត ដើម្បីជំរុញឱ្យរឿងនេះកើតឡើង។
ការមកកម្ពុជា នេះដែរ គោលបំណងធំមួយទៀត គឺលោក Ivan ចង់ឱ្យអ្នកគាំទ្រវិស័យបាល់ទាត់នៅកម្ពុជាតាមដាន និងស្គាល់ La Liga កាន់តែច្បាស់ថែមទៀត។ តាមគម្រោងផែនការរបស់លោក គឺចង់បង្កើតជា Fan Club ឱ្យបានច្រើនតាមដែលអាចធ្វើទៅបាន។ ដោយកាលពីម្សិលមិញនេះ ដោយសារតែរយៈខ្លី លោកបានជួបជាមួយ Fan Club របស់ក្លឹប Real Madrid រួចហើយ និងបានណែនាំវិធីសាស្ត្រជាច្រើន ដើម្បីឱ្យក្លាយជា Fan Club ផ្លូវការទទួលស្គាល់ពី Real Madrid ផ្ទាល់តែម្ដង។
ជាមួយគ្នានេះដែរ លោក Jose Maria ដែលជាប្រតិភូ La Liga មកជាមួយលោក Ivan ដែរនោះ ក៏សម្លឹងមើលឃើញសក្ដានុពលវិស័យបាល់ទាត់នៅកម្ពុជាផងដែរ។ លោកបានទៅជួបជាមួយកីឡាករមួយចំនួន និងបានសួរនាំពួកគេច្រើនពីជីវិតក្នុងវិស័យបាល់ទាត់នៅកម្ពុជា។ លោក រំពឹង ថ្ងៃអនាគត នឹងមាន Fan Club ផ្លូវការជាច្រើន លេចរូបរាងឡើងនៅកម្ពុជា ព្រោះថាការបង្កើត Fan Club គឺជារឿងសំខាន់ណាស់សម្រាប់ក្រុមបាល់ទាត់មួយ៕
Via :news.sabay
