រជ្ជកាលថ្មីរបស់ក្រុម Chelsea និង Arsenal ក្រោមការដឹកនាំរបស់លោក Maurizio Sarri និងលោក Unai Emery បានចាប់ផ្តើមក្នុងភាពផ្ទុយគ្នាស្រឡះក្នុងក្របខ័ណ្ឌ Premier League ប៉ុន្តែ ការជួបគ្នានៅថ្ងៃសៅរ៍នេះរវាងក្រុមទាំង២ នឹងផ្តល់នូវការសាកល្បងយ៉ាងពិតប្រាកដទៅលើកម្រិតនៃភាពខ្លាំងរបស់ក្រុមស្ថិតក្នុងទីក្រុងឡុងដ៍ទាំង២។

ការមិនអាចឈ្នះសិទ្ធិទៅលេងក្នុងក្របខ័ណ្ឌ Champions League នៅរដូវកាលនេះ បានបង្កើតឲ្យមានការផ្លាស់ប្តូរផ្សេងៗក្នុងក្លិបទាំង២។ ប៉ុន្តែ ស្របពេលដែល Chelsea ស៊ាំទៅនឹងការផ្លាស់ប្តូរគ្រូបង្វឹកចុះឡើងក្រោមការកាន់កាប់របស់លោក Roman Abramovich ក្រុម Arsenal នៅតែធ្វើការដោះស្រាយទៅលើយុគសម័យកាលថ្មីរបស់លោក Emery ក្រោយពីស្ថិតនៅជាមួយនឹងលោក Arsene Wenger រយៈពេល ២២ឆ្នាំ ក្នុងនាមជាគ្រូបង្វឹក។

សញ្ញាផ្សេងៗបង្ហាញថា លោក Emery ត្រូវការពេលវេលាច្រើនក្នុងការលុបចោលនូវភាពអវិជ្ជមានផ្សេងៗ ក្រោយពីការបញ្ចប់ការដឹកនាំរបស់លោក Wenger។ ប៉ុន្តែ គ្រូបង្វឹកសញ្ជាតិអេស្ប៉ាញរូបនេះ ពិតជាគ្មានសំណាងសោះក្នុងការប៉ះជាមួយនឹងក្រុម Manchester City នៅថ្ងៃបើកឆាករបស់លោកនៃក្របខ័ណ្ឌ Premier League ខណៈដែលក្រុម Arsenal បានរងបរាជ័យ ២-០ នៅលើទឹកដីខ្លួនឯងកាលពីចុងសប្តាហ៍មុន។

លោក Sarri ក៏បានបញ្ជាក់ផងដែរថា វានឹងមានរយៈពេលយ៉ាងហោចណាស់២ខែ ក្នុងការបង្កើតឲ្យមានទម្រង់លេងបែបវាយសម្រុកក្នុងក្រុម ដែលបានជួយឲ្យលោកក្លាយជាគ្រូបង្វឹកដ៏ឆ្នើមម្នាក់សម្រាប់ក្រុម Napoli។ ប៉ុន្តែ ក្រុម Cheslea បានបើករដូវកាលរបស់ខ្លួនតាមរយៈការយកឈ្នះលើក្រុម Huddersfield ក្នុងលទ្ធផល ៣-០។ ការប្រកួតនេះនឹងចាប់ផ្តើមនៅម៉ោង១១:៣០យប់៕