កីឡាករបាល់ទាត់វ័យក្មេងកម្ពុជាពីររូប ត្រូវបានជ្រើសរើសឱ្យចូលរួមក្នុងកម្មវិធីបោះជំរំហ្វឹកហាត់បាល់ទាត់ MILO Camp រយៈពេល ៤ថ្ងៃ ជាមួយនឹងគ្រូបង្វឹកពីប្រទេសថៃ និងមកពីក្លឹប FC Barcelona។
កីឡាករវ័យក្មេងទាំងពីររូបនេះ ដែលមានអាយុ ១០ឆ្នាំ ម្នាក់ឈ្មោះ Vasunan Kasidej និងកុមារា Tha Niphirith ត្រូវបានជ្រើសរើសចេញពីក្នុងចំណោមក្មេងៗ ដែលមានទេពកោសល្យទាត់បាល់ល្អបំផុតក្នុងប្រទេសកម្ពុជា។ មានការសង្ឃឹមទុកថា វគ្គបណ្ដុះបណ្ដាលនេះនឹងជួយពួកគេ ក្នុងការអភិវឌ្ឍជំនាញឲ្យកាន់តែមានការរីកចម្រើនបន្ថែមទៀត ហើយអាចចែករំលែកនូវចំណេះដឹង ជំនាញ ដែលទទួលបាននេះទៅដល់មិត្តភ័ក្ដិ និងមិត្តរួមក្រុមក្រោយពេលដែលពួកគេត្រឡប់មកខ្មែរវិញ។
ផ្តើមចេញពីការបង្កើតភាពជាដៃគូរវាង MILO នៃក្រុមហ៊ុន Nestlé និង FC Barcelona ការបោះជំរំហ្វឹកហាត់នេះ គឺជាឱកាសថ្មី សម្រាប់កីឡាករវ័យក្មេងចំនួន ៥២ នាក់ ដែលមានអាយុចន្លោះពី ៧-១២ ឆ្នាំ នឹងត្រូវបានជ្រើសរើស ដើម្បីមានឱកាសធ្វើដំណើរទៅកាន់ Barcelona នាខែតុលា ខាងមុខនេះ សម្រាប់វគ្គហ្វឹកហាត់ដែលធ្វើឡើងដោយគ្រូបង្វឹកលំដាប់កំពូលៗរបស់ក្លឹបមួយនេះ។
កម្មវិធីហ្វឹកហាត់នេះ អាចកើតមានឡើងដោយសារភាពជាដៃគូរវាង ម៉ៃឡូ នៃក្រុមហ៊ុន Nestlé និង FC Barcelona ដែលបានបង្កើតឡើងដើម្បីជំរុញ និងលើកទឹកចិត្តកុមារនៅទូទាំងពិភពលោកទាំងអស់ឱ្យចូលរួមលេងកីឡាឲ្យបានច្រើន និងដើម្បីជួយលើកតម្កើង និងឱ្យតម្លៃដល់ក្លឹប FC Barcelona ក៏ដូចជារៀនពីរបៀបដោះស្រាយបញ្ហាទាំងអស់នោះនៅក្នុងជីវិតរបស់ពួកគេ។
ស្តាប់ការរៀបរាប់ក្នុងវីដេអូខាងក្រោម៖
ឯកឧត្តម អ៊ុក សិទ្ធីជាតិ អគ្គនាយកនៃអគ្គនាយកដ្ឋានកីឡានៃក្រសួងអប់រំ យុវជន និងកីឡា បានថ្លែងឲ្យដឹងថា លោកពិតជាសប្បាយចិត្តណាស់ដែលបានឃើញអត្តពលិកកម្ពុជា ត្រូវបានផ្តល់ឱកាសឱ្យចូលរួមក្នុងកម្មវិធីនេះជាលើកដំបូង។ លោកបាននិយាយថា៖ “បាល់ទាត់ ជាកីឡាមួយប្រភេទដែលកំពុងមានការរីកចម្រើនខ្លាំងនៅក្នុងប្រទេសកម្ពុជា និងត្រូវបានជ្រើសរើសជាប្រភេទកីឡាម្យ៉ាងសម្រាប់បង្រៀនក្មេងៗនូវបំណិនជីវិតសំខាន់ៗជាច្រើន”។
ការបោះជំរំនេះនឹងត្រូវធ្វើឡើងនៅក្លឹប PTT Bluewave Chonburi Futsal Club ក្នុងខេត្ត Chonburi ប្រទេសថៃ។ ការហ្វឹកហាត់ផ្លូវការនឹងចាប់ផ្តើមនៅថ្ងៃទី៣១ ខែសីហា ដោយមានគ្រូបង្វឹកមកពីប្រទេសថៃ រួមជាមួយនឹងគ្រូបង្វឹកនាំមុខគេមកពីក្លឹប FC Barcelona៕
Via :news.sabay
