បន្ទាប់ពីមានភាពចម្រូងចម្រាស់ពាក់ព័ន្ធនឹងការដាក់ឲ្យចូលលេងក្នុងប្រកួតក្របខ័ណ្ឌUCLនៅយប់ថ្ងៃអង្គារនេះ រវាងកំពូលអ្នកចាំទីទាំងពីររបស់ក្លឹបអធិរាជស គឺ Kaylor Navas និង Thibaut Courtois ខ្សែការពារសញ្ជាតិបារាំង Raphael Varane បាននិយាយថា រូបគេនិងក្លឹបទាំងមូលពិតជាមានសំណាងណាស់ដែលមានកីឡាករចាំទីល្អៗអញ្ចឹង។
នៅក្នុងសន្និសីទមុនប្រកួតរវាង ក្លឹប Real Madrid និងម្ចាស់ផ្ទះ CSKA Moskow កីឡាករវ័យ ២៥ឆ្នាំរូបនេះបានលើកឡើងថា៖ ” រូបខ្ញុំផ្ទាល់ពិតជាមិនដឹងថា ពីរនាក់ហ្នឹងនរណានឹងត្រូវលេងក្នុងប្រកួតក្របខ័ណ្ឌ UCL នេះទេ។ សម្រាប់ខ្ញុំអ្នកចាំទីទាំងពីរនាក់នេះល្អដូចគ្នា “។
កីឡាករសម្បុរស្រអែមមួយនេះ បានបន្តថា៖ ” តាមការពិតទៅមិនមែនមានតែអ្នកចាំទី ២ទេ គឺមាន៤នាក់ឯណោះ។ យើងទាំងគ្នាបានជឿជាក់ពួកគេ(អ្នកចាំទីទាំង៤) ប៉ុន្តែការប្រកួតប្រជែងបានធ្វើឲ្យម្នាក់ៗ អភិវឌ្ឍសមត្ថភាពរបស់ខ្លួនកាន់តែប្រសើរឡើង”។
កាលពីខែសីហាកន្លងទៅ ក្លឹប Real Madrid បានផ្ទេរកីឡាករអ្នកចាំទីសញ្ជាតិបែលហ្សិក Thibaut Courtois ពីក្លឹប Chelsea ក្នុងតម្លៃ ៣៥លានអឺរ៉ូ។ ការផ្ទេររបស់កីឡាករវ័យ២៦ឆ្នាំនេះ ត្រូវបានមជ្ឈដ្ឋានបាល់ទាត់ជាច្រើនមើលឃើញថា អាចធ្វើឲ្យកីឡាករអ្នកចាំទីសញ្ជាតិកូស្តារីកា Kaylor Navas បាត់បង់តំណែងជាអ្នកចាំទីដៃទីមួយប្រចាំក្លឹប Real Madrid ៕
ប្រភពពី: Sabay
