កង្វល់របស់ក្រុម Barcelona ត្រូវបានធ្វើឲ្យកើនឡើងតាមរយៈសំណួរផ្សេងៗអំពីតារាឆ្នើម Lionel Messi ប៉ុន្តែ បញ្ហានៃការពឹងផ្អែកលើខ្សែប្រយុទ្ធរូបនេះខ្លាំងពេក អាចនឹងបង្ហាញឲ្យឃើញកាន់តែច្បាស់ក្នុងរយៈពេលប៉ុន្មានសប្តាហ៍ខាងមុខនេះ។ ទិដ្ឋភាពរបស់ Messi ដួលទៅលើវាលស្មៅ ដោយយកដៃឱបដៃស្តាំរបស់គេ អំឡុងពេលក្រុម Barca ទទួលជ័យជម្នះ ៤-២ លើក្រុម Sevilla កាលពីថ្ងៃសៅរ៍ បានបង្កើតឲ្យមានប្រតិកម្មផ្សេងៗក្នុងកីឡដ្ឋាន Camp Nou ដែលជាធម្មតាត្រូវបានបញ្ចេញសម្រាប់ការរបូតគ្រាប់បាល់ផ្សេងៗ។

ការបង្ហាញពីកង្វល់ផ្សេងៗបានកើតឡើងក្នុងរយៈពេលដ៏ខ្លី ក្រោយពីសំឡេងកញ្ចែចុងក្រោយ នៅពេលដែលក្លិបនេះ បានប្រកាសថា Messi បានបាក់ឆ្អឹងដៃរបស់គេ។ ការអវត្តមានរបស់គេ នឹងធ្វើឲ្យ Barca ស្ថិតក្នុងភាពទន់ខ្សោយក្នុងដំណាក់កាលដ៏សំខាន់បំផុត ពោលគឺសម្រាប់ការប្រកួតសំខាន់ៗជាច្រើន ក្នុងនោះរាប់បញ្ចូលទាំងការជួបជាមួយនឹងក្រុម Inter Milan ក្នុងក្របខ័ណ្ឌ Champions League នៅរាត្រីនេះ ការប្រកួត Clasico ជាមួយនឹងក្រុម Real Madrid នៅថ្ងៃអាទិត្យ នៅមុនពេលការប្រកួតជើងទី២ នៅអ៊ីតាលី ជាមួយនឹងក្រុម Inter នៅដើមខែក្រោយ ផងដែរ។

ប្រសិនបើរូបគេត្រូវសម្រាកព្យាបាលយូរជាងការរំពឹងទុក រូបគេអាចនឹងអវត្តមានក្នុងការប្រកួតដ៏សំខាន់ជាមួយនឹងក្រុម Real Betis និង Atletico Madrid ក្នុងក្របខ័ណ្ឌ La Liga ផងដែរ។ ហេតុនេះ លោក Ernesto Valverde ដែលជាគ្រូបង្វឹក ត្រូវតែរកដំណោះស្រាយ ដើម្បីបង្ហាញថា ក្រុម Barcelona នៅតែមានភាពខ្លាំង បើទោះបីអវត្តមានតារាឆ្នើម Messi ក្នុងក្រុមក៏ដោយ។ ការប្រកួតនេះនឹងចាប់ផ្តើមនៅម៉ោង២ទៀបភ្លឺ៕