អតីតខ្សែបម្រើដ៏ឆ្នើមរបស់ក្លិប Manchester United លោក Ryan Giggs អាចនឹងធ្វើដំណើរមកទស្សនកិច្ចនៅប្រទេសកម្ពុជា ដើម្បីចូលរួមការបើកការប្រកួតព្រឹត្តិការណ៍ប្រចាំឆ្នាំ Tiger Street Football Festival លើកទី៦ ដែលនឹងចាប់ផ្តើមនៅថ្ងៃទី១៨ ខែមករា ខាងមុខនេះ។
មានការលេចឮព័ត៌មានដ៏គួរឲ្យចាប់អារម្មណ៍ជាច្រើនថា លោក Giggs វ័យ៤៤ឆ្នាំ ដែលបានចំណាយពេលអាជីពជាកីឡាកររបស់គេសម្រាប់តែក្លិប Man United នោះ នឹងបន្ថែមបរិយាកាសកាន់តែរំភើបក្នុងព្រឹត្តិការណ៍កីឡាបាល់ទាត់មួយនេះ ដែលនឹងត្រូវធ្វើការប្រកួតក្នុងខេត-ទីក្រុងចំនួន៨។ មិនមានការអះអាងជាផ្លូវការណាមួយនៅឡើយទេអំពីការធ្វើដំណើររបស់លោក ឬក៏សកម្មភាពនានាទាក់ទងនឹងដំណើរទស្សនកិច្ចនេះ ប៉ុន្តែ ប្រសិនបើលោកពិតជាធ្វើដំណើរមកកាន់កម្ពុជាមែន នេះនឹងក្លាយជាបទពិសោធដែលមិនអាចបំភ្លេចបានសម្រាប់អ្នកគាំទ្រកីឡាបាល់ទាត់កម្ពុជា។
ការប្រកួតកីឡាបាល់ទាត់លើទីលានបាល់ទាត់ខ្នាតតូចតាមដងវិថីដែលមានឈ្មោះថា Tiger Street Football Festival នេះ ផ្តល់ជូននូវរង្វាន់ជាទឹកប្រាក់៥០០០០ដុល្លារ ហើយនិងនឹងធ្វើការប្រកួតវគ្គជម្រុះរបស់ខ្លួននៅក្រុងព្រះសីហនុ កំពង់ស្ពឺ បាត់ដំបង សៀមរាប ប៉ោយប៉ែត កំពង់ចាម កណ្តាល និងរាជធានីភ្នំពេញ ដែលជាកន្លែងបញ្ចប់នៃយុទ្ធនាការនេះ។
លោក Giggs បានចាប់ផ្តើមអាជីពរបស់គេជាមួយនឹងក្លិប Man United ក្នុងឆ្នាំ១៩៩០ ដោយបន្តលេងរហូតដល់ឆ្នាំ២០១៤ ក្នុងនោះរូបគេបានបង្ហាញខ្លួនចំនួន៦៧២លើក និងស៊ុតបាល់បញ្ចូលទី១១៤គ្រាប់ ខណៈដែលលោកក៏បានដឹកនាំក្រុម Man United ក្នុងរយៈពេលខ្លីផងដែរ ក្រោយពីចូលនិវត្តន៍៕
កែសម្រួលដោយ៖ Cambosport
Via :cambosport