បន្ទាប់ពី U23 វៀតណាមបានទម្លាក់ក្រុមខ្លាំងៗជាបន្តបន្ទាប់ ទីបំផុតក្រុមដែលចេញពីតំបន់អាស៊ីអាគ្នេយ៍មួយនេះបានឈានដល់វគ្គផ្តាច់ព្រ័ត្រAFC U-23 Championship ជាលើកដំបូងក្នុងប្រវត្តិសាស្រ្ត ដែលនឹងត្រូវជួបជាមួយនឹងប្រទេស អ៊ូសបេគីស្ថាន នៅថ្ងៃសៅរ៍នេះ។
ដោយឡែក គ្រូបង្វឹកសញ្ជាតិកូរ៉េខាងត្បូងរបស់ ក្រុមជម្រើសជាតិវៀតណាមអាយុក្រោម២៣ឆ្នាំ បានសន្យាថាលោកនឹងមិនធ្វើឲ្យអ្នកគាំទ្រវៀតណាមខកចិត្តឡើយ សម្រាប់ការប្រកួតវគ្គផ្តាច់ព្រ័ត្រ Asian Cup មួយនេះ។
តើលោក Park Hang-seo ជានរណា?
Park Hang-seo ជាគ្រូបង្វឹកថ្មីសញ្ជាតិកូរ៉េខាងត្បូង របស់ក្រុមជម្រើសជាតិ និង U23 វៀតណាមដែលទើបបានមកដឹកនាំក្រុមនេះជាង១០០ថ្ងៃប៉ុណ្ណោះ។ ពោលគឺលោកបានមកដឹកនាំវៀតណាមកាលពីចុងខែកញ្ញា ឆ្នាំ២០១៧កន្លងទៅ។
លោក Park វ័យ៥៨ឆ្នាំ មានបទពិសោធន៍ជាច្រើនក្នុងនាមជាអ្នកចាត់ការក្លឹប។ លោកធ្លាប់បានដឹកនាំក្លឹបធំៗនៅក្របខ័ណ្ឌបាល់ទាត់កំពូលរបស់កូរ៉េខាងត្បូង K League មានដូចជា ក្រុម Gyeongnam FC, Jeonnam Dragons និង Sangju Sangmu Phoenix ជាដើម ក្នុងរយៈពេលជាងមួយទសវត្សរ៍មកនេះ។ អ្វីដែលពិសេសបំផុត កាលពីឆ្នាំ២០០២ លោកធ្លាប់បានចូលរួមដឹកនាំកូរ៉េខាងត្បូង បានលេខ៤ សម្រាប់ព្រឹត្តិការណ៍ World Cup ក្នុងនាមជាជំនួយការគ្រូបង្វឹក៕
ប្រភពពី: Sabay