Gerrard Pique បានបន្តកិច្ចសន្យាថ្មីជាមួយក្រុម Barcelona កាលពីថ្ងៃច័ន្ទ និងមានសុពលភាពក្នុងការលេងអោយក្រុមរហូតដល់ឆ្នាំ២០២២។ ស្របពេលខ្សែការពារកណ្តាលក្រុមជម្រើសជាតិអេស្បាញរូបនេះបាននិយាយថាៈ ខ្ញុំគួរសម្រេចចិត្តចូលនិវត្តន៏ប្រសើរជាជាងផ្ទេរទៅលេងនៅក្លឹបផ្សេង។ ស្នាក់នៅទីនេះមានលក្ខណៈបែបធម្មជាតិ និងល្អបំផុតសម្រាប់ជីវិតរស់នៅរបស់ខ្ញុំនិងគ្រួសារ ហើយខ្ញុំមិនដែលមានគម្រោងចង់ចាកចេញទៅក្លឹបផ្សេងនោះទេ ទោះបីជារដូវកាលមុនយើងមិនបានឈ្នះពានជើងឯកក្តី។ ការពិតយើងតែងតែប្រកួតប្រជែង ដើម្បីឈ្នះជើងឯកជារៀងហូតមក។
Pieque បានជួយក្រុមលើកពាន La Liga 6ដង និង UEFA Champion League ៣ដង បានបន្តថាៈ ខ្ញុំសង្ឃឹមថា ចុងក្រោយនេះ ខ្ញុំអាចបញ្ចប់អាជីពបាល់ទាត់របស់ខ្ញុំនៅកីឡាដ្ឋាន Camp Nou ក្រោយពេលដែលខ្ញុំត្រលប់ពី Man.United មកកាន់ក្រុម Barcelona កាលពីឆ្នាំ២០០៨កន្លងមក។
សម្រាប់ក្រុមជម្រើសជាតិអេស្បាញកីឡាករវ័យ ៣១ឆ្នាំរូបនេះ បានជួយក្រុមលើកពាន World Cup នៅឆ្នាំ២០១០ និងពានរង្វាន់ទ្វីបអឺរ៉ុបនៅឆ្នាំ២០១២ ផងដែរ។
ប្រភព៖ sport-english
