ការប្រកួតបាល់ទាត់ពានរង្វាន់ឯកឧត្ដម ហង់ ជួនណារ៉ុន លើកទី១ បង្កើតម្សិលមិញក្នុងគោលបំណងដើម្បីសុខភាព សាមគ្គីភាព និងបង្កើនការទំនាក់ទំនងរវាងអគ្គនាយកដ្ឋានមួយៗដែលរវល់មិនសូវបានធ្វើការជាមួយគ្នាកន្លងមក។
ឯកឧត្ដម ហង់ ជូនណារ៉ុង បានឲ្យដឹងថា ការប្រកួតពានរង្វាន់មួយនេះ នឹងជួយបណ្ដុះគំនិតឲ្យមន្ត្រីក្រសួងអប់រំគ្រប់ជាន់ថ្នាក់ ស្រឡាញ់កីឡា ស្រឡាញ់សុខភាព និងចេះថែរក្សាសុខភាព ហើយនៅពេលបានចូលលេងដូចនេះ សុខភាពក៏ល្អប្រសើរទៅតាមផងដែរ។ ក្រៅពីសុខភាពក៏ជាការទំនាក់ទំនងឲ្យបានស្គាល់គ្នាទៅវិញទៅមកតាមរយៈការលេងបាល់ក្នុងពានរង្វាន់មួយនេះទៀតផង។
ការប្រកួតពានរង្វាន់ខាងលើនេះ ក៏ជាការស្វែងរកកីឡាករឆ្នើមៗ ដើម្បីឈានទៅបង្កើតក្រុមបាល់ទាត់មួយ ប្រកួតតំណាងឲ្យក្រសួងអប់រំ យុវជន និងកីឡា ក្នុងពានរង្វាន់អន្តរក្រសួងនៅពេលខាងមុខទៀតផង។
សម្រាប់ការប្រកួតពានរង្វាន់ ហង់ ជួនណារ៉ុន លើកទី១នេះ មានក្រុមចំនួន៧ មកពីអគ្គនាយកដ្ឋាន និងនាយដ្ឋាននានាៗរបស់ក្រសួងអប់រំ យុវជន និងកីឡា។ ក្រុមនិមួយៗនឹងត្រូវប្រកួតវិលជុំសន្សំពិន្ទុរហូតគ្រប់ក្រុម ហើយក្រុមណាដែលមានពិន្ទុច្រើនជាងគេគឺឈ្នះពានរង្វាន់តែម្ដង។ ការប្រកួតនេះធ្វើរយៈពេល២ខែ គឺចាប់ពីថ្ងៃទី៥ កុម្ភៈ ដល់ ទី៦ មេសា ២០១៨ នៅទីលានបាល់ទាត់វត្តកោះ ដោយឡែកការប្រកួតបើក និងបិទធ្វើនៅពហុកីឡដ្ឋានជាតិ៕
Via :news.sabay
