Dani Alves បានលេងតួនាទីជាអ្នកចាំទីក្នុងការប្រកួតរវាង Paris Saint-Germain និង Sochaux កាលពីម្សិលមិញបន្ទាប់ពីអ្នកចាំទីហ្ស៊ីន Kevin Trapp ត្រូវពិន័យកាតក្រហម។
យ៉ាងណារូបគេមិនមែនជាកីឡាករដំបូងទេដែលធ្វើជាអ្នកចាំទីនៅពេលស្ថានការណ៍ចាំបាច់មកដល់របៀបនេះ ជាក់ស្ដែងមានខ្សែការពារ, ខ្សែបម្រើ និងមានដល់ខ្សែប្រយុទ្ធច្រើនទៀត ដែលធ្លាប់ទទួលបទពិសោធន៍ពាក់ស្រោមដៃឈរយាមទី។ យើងទៅមើលទាំងអស់គ្នាថាតើមាននរណាខ្លះ៖
១. ខ្សែប្រយុទ្ធ Niall Quinn ចាំទីឲ្យ Manchester City
Niall Quinn មានតួនាទីលេងជាខ្សែប្រយុទ្ធបានចុះទៅចាំទីឲ្យ Manchester City ក្នុងការប្រកួតទល់ Derby កាលពីឆ្នាំ១៩៩១ បន្ទាប់ពីអ្នកចាំទីពិតប្រាកដ Tony Coton ត្រូវពិន័យកាតក្រហម។ ក្នុងប្រកួតនោះ Quinn បានចាប់បាល់ប៉េណាល់ទីជាប់ ហើយជួយក្រុមឲ្យឈ្នះការប្រកួត។
២. ខ្សែការពារ John Terry ចាំទីឲ្យ Chelsea
ខ្សែការពារ John Terry បានលេងជាអ្នកចាំទីក្នុងការប្រកួតរវាង Chelsea និង Reading កាលពីឆ្នាំ២០០៦។ ប្រកួតនោះ អ្នកចាំទី Petr Cech បានរងរបួសក្បាលយ៉ាងធ្ងន់ធ្ងរក្រោយប៉ះជាមួយ Stephen Hunt ធ្វើឲ្យរូបគេត្រូវពាក់មួយការពារក្បាលរហូតដល់សព្វថ្ងៃ។
៣. ខ្សែការពារ Rio Ferdinand ចាំទីឲ្យ Manchester United
Rio Ferdinand បានពាក់ស្រោមដៃចាំទីឲ្យ Manchester United ក្នុងការប្រកួតទល់នឹង Portsmouth កាលពីឆ្នាំ២០០៨។ ការប្រកួតកាលនោះ Edwin Van der Sar រងរបួសត្រូវប្ដូរចេញខណៈអ្នកចាំទីដៃទីពីរ Thomas Kusczak បានកាតក្រហម។
៤. ខ្សែបម្រើ Glenn Hoddle ចាំទីឲ្យ Spurs
Glenn Hoddle បានលេងជាអ្នកចាំទីឲ្យ Tottenham Hotspur ក្នុងការប្រកួតទល់នឹង Man United កាលពីឆ្នាំ១៩៨០។ ខ្សែបម្រើសញ្ជាតិអង់គ្លេសធ្លាប់លេងជាអ្នកចាំទីពេលមានអាសន្ន ៣ដងក្នុងអាជីពរបស់ខ្លួន។
៥. ខ្សែការពារ David Webb ចាំឲ្យ Chelsea
David Webb បានលេងជាអ្នកចាំទីឲ្យ Chelsea ក្នុងការប្រកួតទល់នឹង Ipswich កាលពីឆ្នាំ ១៩៧១។ គ្រានោះអ្នកចាំទីដៃទីមួយ Peter Bonetti រងរបួសនៅប្រកួតកន្លងទៅ ហើយអ្នកចាំទីដៃទីពីរ John Phillips ក៏របួសដូចគ្នា។ Chelsea បានកោះហៅអ្នកចាំទីដៃទី៣ Steve Sherwood ប៉ុន្តែរូបគេស្ទះចរាចរណ៍ធ្វើឲ្យក្លឹបបង្ខំចិត្តដាក់ Webb ឲ្យចាំពេញមួយប្រកួត។
៦. ខ្សែការពារ Cosmin Moti ចាំឲ្យ Ludogorets
Cosmin Moti ធ្លាប់លេងជាអ្នកចាំទីឲ្យ Ludogorets ក្នុងប្រកួតទល់ Steaua Bucharest កាលពីឆ្នាំ២០១៤។ ជំនួបកាលនោះគឺលេងក្នុងវគ្គ Play off កម្មវិធីដ៏ធំនៅ Champions League។ អ្នកចាំទីដៃទីមួយ Stoyanov ត្រូវបណ្ដេញចេញ ធ្វើឲ្យ Moti លេងជាអ្នកចាំទីជំនួស។ មិនខកបំណង ខ្សែការពាររូបនេះចាប់បាល់ប៉េណាល់ទីបាន២ដងជួយក្រុមឡើងទៅវគ្គចែកពូល។
៧. ខ្សែប្រយុទ្ធ Harry Kane ចាំឲ្យ Tottenham
Harry Kane ធ្លាប់លេងជាអ្នកចាំទីឲ្យ Tottenham ក្នុងការប្រកួតទល់ Asteras Tripoli កាលពីឆ្នាំ២០១៤។ ពាន Europa League កាលណោះ Kane ស៊ុតបាន៣គ្រាប់ម្នាក់ឯងរួចក៏ចុះមកចាំទី ដោយសារ Hugo Lloris ត្រូវពិន័យកាតក្រហម។ យ៉ាងណាខ្សែប្រយុទ្ធសញ្ជាតិអង់គ្លេសបានធ្វើឲ្យរបូតបាល់១គ្រាប់ជាការទាត់ Free Kick ស្រាលៗរបស់កីឡាករក្រុម Asteras៕
ប្រភព៖ The Sun ប្រែសម្រួល៖ វីរ័ត្ន
Via :news.sabay
