កាលពី UEFA Champions League វគ្គពាក់កណ្ដាលផ្ដាច់ព្រ័ត្រឆ្នាំ២០០៩ មានរឿងចម្រូងចម្រាសមួយបានកើតឡើងដោយសារការចោទប្រកាន់អាជ្ញាកណ្ដាលថាបានកាត់ក្ដីលំអៀងទៅ Barcelona។
ការប្រកួតជើងទីមួយនៅទឹកដី Nou Camp រវាង Barca និង Chelsea បានស្មើគ្នា ០-០ ហើយនៅទឹកដី Stamford Bridge វិញគឺបញ្ចប់ក្នុងលទ្ធផល ១-១ ធ្វើឲ្យក្រុមយក្សមកពីកាតាឡាន់ឡើងទៅវគ្គផ្ដាច់ព្រ័ត្រដោយយោងតាមរូបមន្ត Away goal។
ម្ចាស់ផ្ទះ Chelsea បានធ្លាក់ចេញពីកម្មវិធីទាំងមិនអស់ចិត្ត ដោយខ្លួនបាននាំមុខមុនតាំងពីនាទី ទី៩ ស៊ុតបញ្ចូលទីដោយខ្សែការពារ Essien តែត្រូវ Iniesta ស៊ុតតាមស្មើវិញនាទី៩០+៣។
ក្រុមរហស្សនាមថាតោខៀវបានចោទអាជ្ញាកណ្ដាលមិនផ្ដល់បាល់ប៉េណាល់ទីឲ្យពួកគេ៤ករណីផ្សេងគ្នា ទី១ការធ្វើឲ្យ Malouda ដួលក្នុងប្រអប់ ទី២ការធ្វើឲ្យ Droqba ដួល ហើយទី៣ និងទី៤សុទ្ធតែជាបាល់ប៉ះដៃកីឡាករ Barcelona។
ទោះរំលងបាន៩ឆ្នាំក៏អាជ្ញាកណ្ដាល Tom Henning Ovrebo នៅចាំមិនភ្លេចពីហេតុការណ៍យប់នោះ គឺលោកត្រូវគេគំរាមសម្លាប់ក្រោមហេតុផលថាលំអៀងទៅ Barcelona។ បុរសដែលបច្ចុប្បន្នចូលនិវត្តន៍ពីអាជីពអាជ្ញាកណ្ដាល បានបង្ខំចិត្តប្ដូរសណ្ឋាគាររបស់ខ្លួនទាំងយប់ដើម្បីសុវត្ថិភាព។
“ក្រោយការប្រកួតខ្ញុំមិននិយាយរកកីឡាករណាទាំងអស់។ ខ្ញុំចាំបានពួកយើងត្រូវប្ដូរសណ្ឋាគារដោយសារមនុស្សជាច្រើនកំពុងមានកំហឹង។ យើងរស់ដោយប្រុងប្រយ័ត្ននៅយប់នោះ និងថ្ងៃបន្ទាប់”។ Ovrebo និយាយដូច្នេះ៕