លោក Mauricio Pochettino អ្នកចាត់ការទូទៅរបស់ក្រុម Tottenham Hotspur បានច្រានចោលចំពោះការលើកឡើងផ្សេងៗដោយអតីតគ្រូបង្វឹករបស់ក្លិប Spurs លោក Andre Villas-Boas ថា ខ្សែប្រយុទ្ធ Harry Kane ត្រូវតែចាកចេញពីក្លិបនេះ ប្រសិនបើរូបគេចង់ឈ្នះពាននានា។
លោក Villas-Boas បានផ្តល់ឱកាសឲ្យ Kane បង្ហាញខ្លួនក្នុងការប្រកួតក្របខ័ណ្ឌ Premier League ជាលើកទី១របស់គេ កាលពីឆ្នាំ២០១២ ប៉ុន្តែ អាជីពរបស់តារាឆ្នើមអន្តរជាតិអង់គ្លេសរូបនេះ បានទទួលផ្លែផ្កាត្រឹមពេលដែលគ្រូបង្វឹកសញ្ជាតិព័រទុយហ្គាល់រូបនេះ បានចាកចេញកាលពីខែធ្នូ ឆ្នាំ២០១៣។ បច្ចុប្បន្ន Kane បានស៊ុតបាល់បញ្ចូលទីច្រើនជាង ១០០គ្រាប់ ក្នុងរយៈពេល៤រដូវកាលរបស់គេ ប៉ុន្តែ ក្រុម Tottenham មិនបានឈ្នះពានអ្វីឡើយ ស្របពេលដែលខ្សែប្រយុទ្ធរូបនេះ ត្រូវបានគេទាក់ទងជាច្រើនជាមួយនឹងការផ្ទេរទៅកាន់ក្លិបម្ចាស់ជើងឯកអឺរ៉ុប Real Madrid។
លោក Villas-Boas បានឲ្យដឹងកាលបីសប្តាហ៍នេះថា៖ «ប្រសិនបើរូបគេពិតជាស្រេកឃ្លានក្នុងការឈ្នះពានមែននោះ រូបគេនឹងត្រូវតែចាកចេញពីក្លិប Spurs ហើយប្រសិនបើរូបគេមិនចង់ឈ្នះពានទេនោះ ប៉ុន្តែចង់បានស្ថិរភាព និងការទទួលស្គាល់ រូបគេនឹងត្រូវបន្តនៅជាមួយនឹង Spurs»។ ប៉ុន្តែ ទោះបីជាយ៉ាងណា នៅមុនពេលការប្រកួតរបស់ក្រុម Spurs ជាមួយនឹង Rochdale ក្នុងពាន FA Cup នារាត្រីនេះ លោក Pochettino បានបញ្ជាក់ថា Kane អាចបំពេញមហិច្ឆតារបស់ខ្លួន តាមរយៈការបន្តនៅជាមួយនឹងក្លិប Tottenham៕
លោក Pochettino៖ Kane នឹងបន្តនៅជាមួយ Spurs ដើម្បីឈ្នះពាននានា
អត្ថបទទាក់ទង