មុនការប្រកួតលីគកំពូលកម្ពុជាឈានចូលមកដល់នៅថ្ងៃទី៣ខែមីនាឆ្នាំ២០១៨ខាងមុខនេះ គណៈកម្មការប្រកួតបាល់ទាត់ជាតិកម្ពុជាបានប្រកាសថាក្នុងចំណោមក្លឹបទាំង១២នៅលីគកំពូល មាន៦ក្លឹបនឹងយកពហុកីឡដ្ឋានជាតិធ្វើជាទឹកដីបណ្ដោះអាសន្នសិន។
កាលពីចប់រដូវកាលមុនភ្លាម សហព័ន្ធកីឡាបាល់ទាត់កម្ពុជាបានបញ្ជាក់ថាក្លឹបទាំងអស់ត្រូវរកកន្លែងធ្វើជាទឹកដីរបស់ខ្លួន មិនឱ្យយកពហុកីឡដ្ឋានជាតិធ្វើជាទឹកដីទៀតនោះទេ។ យ៉ាងណាមិញ បើតាមលោក ឆាំង ពិសិដ្ឋ លេខាប្រតិបត្តិនៃគណៈកម្មការប្រកួតបាល់ទាត់ជាតិកម្ពុជាបានបញ្ជាក់ថាដោយសាររដូវកាលនេះក្លឹបខ្លះនៅមិនទាន់រៀបចំកីឡដ្ឋានរបស់ខ្លួនរួច ទើបមានការសម្រួលយកពហុកីឡដ្ឋានជាតិប្រើបណ្ដោះអាសន្នសិន។
ក្លឹបទាំង៦នោះត្រូវបានគេដឹងថា មានប៉ូលិស ណាហ្គាវើល បឹងកេត Angkor Tiger Sotilo Angkor និងក្រសួងការពារជាតិ។ ដោយតាមគម្រោងក្រុមប៉ូលិសប្រើកីឡដ្ឋាននៅ SCT Sports Complex ទឹកដី 7NG ប៉ុន្តែការរៀបចំមិនទាន់រួចទើបប្រើពហុកីឡដ្ឋានជាតិសិន។ Angkor Tiger និង Sotilo Angkor គ្រោងប្រើកីឡដ្ឋានសៀមរាប ក៏ប៉ុន្តែជួសជុលមិនទាន់រួច អាចដាក់ដំណើរការនៅជើងទី២នៃលីគកំពូលកម្ពុជា។ បឹងកេត ដែលមានចំណាប់អារម្មណ៍ប្រើកីឡដ្ឋានខេត្តកណ្ដាល ក៏ត្រូវការពេលទៀតដែរ ទើបអាចប្រើប្រាស់ក្នុងការប្រកួតផ្លូវការបាន។
ចំពោះក្រសួងការពារជាតិវិញ កីឡដ្ឋានស្ដាតចាស់កំពុងតែជួសជុល ដូច្នេះក៏ត្រូវការពេលដែរទើបអាចបើកដំណើរការបាន។ ដោយឡែកសម្រាប់ណាហ្គាវើលវិញ នៅមិនទាន់មានដំណឹងថាយកកន្លែងណាធ្វើទឹកដីនៅឡើយទេ ប៉ុន្តែសម្រាប់ជើងទី២នៃលីគកំពូលកម្ពុជា ឃើញថាកាលវិភាគបានដាក់កីឡដ្ឋានរបស់អាស៊ីអឺរ៉ុបធ្វើជាទឹកដីរបស់ពួកគេ៕
Via :news.sabay