លោក Arsene Wenger បានទទួលស្គាល់ថា ការប្រជែងយកចំណាត់ថ្នាក់លេខ៤នៅលើកំពូលតារាង សម្រាប់ក្រុម Arsenal នៅពេលនេះ ស្ទើរតែមិនអាចទៅរួចឡើយ ក្រោយពីក្រុមកាំភ្លើងធំមួយនេះ លិចលុងកាន់តែជ្រៅ បន្ទាប់ពីចាញ់ក្នុងលទ្ធផល ២-១ នៅលើទឹកដីក្រុម Brighton ក្នុងការប្រកួតក្របខ័ណ្ឌ Premier League កាលពីថ្ងៃអាទិត្យ។
ការរងបរាជ័យជាលើកទី៤ជាប់ៗគ្នារបស់ពួកគេ ក្នុងរាល់យុទ្ធនាការទាំងអស់ បានបន្ថែមកម្តៅកាន់តែខ្លាំងទៅលើអនាគតរបស់លោក Wenger ស្របពេលមានព័ត៌មានទាក់ទងនឹងការប្រជុំរបស់កីឡាករ និងការធ្លាក់ចុះនូវការគាំទ្រទៅលើគ្រូបង្វឹកសញ្ជាតិបារាំងរូបនេះ ដែលបានចូលកាន់តំណែងក្នុងក្លិប Arsenal ចាប់តាំងឆ្នាំ១៩៩៦។
ការរងបរាជ័យជាលើកទី៨របស់ក្រុម Arsenal ចាប់តាំងពីដើមឆ្នាំថ្មីនេះ បានធ្វើឲ្យពួកគេដេញតាមពីក្រោយក្រុមស្ថិតក្នុងចំណាត់ថ្នាក់លេខ៤ដល់ទៅ១៣ពិន្ទុ ខណៈដែលចំណាត់ថ្នាក់នេះ នឹងត្រូវឈ្នះកៅអីទៅលេងក្នុងក្របខ័ណ្ឌ Champions League នៅរដូវកាលក្រោយ។
នៅពេលដែលត្រូវបានចោទសួរអំពីការប្រជែងយកចំណាត់ថ្នាក់លេខ៤ លោក Wenger បានប្រាប់ទូរទស្សន៍ BBC ថា៖ «វាពិតជាលំបាកណាស់ វាស្ទើរតែមិនអាចទៅរួចឡើយនៅពេលនេះ ព្រោះយើងដេញតាមពីក្រោយឆ្ងាយពេកហើយ។ យើងត្រូវការឲ្យក្រុម២ភ្លាត់ស្នៀត មិនមែនតែ១ក្រុមឡើយ។ ប៉ុន្តែ នៅពេលនេះ យើងមានបារម្ភផ្សេងគ្នា ទៅលើការវិលទៅកាន់ផ្លូវនៃជ័យជម្នះ»៕
លោក Wenger៖ ការប្រជែងយកកៅអីលេខ៤ ស្ទើរតែមិនអាចទៅរួចឡើយសម្រាប់ Arsenal
អត្ថបទទាក់ទង