វិរបុរស Ryan Giggs របស់ក្រុមបិសាចក្រហម និងត្រូវជា Brand Ambassador របស់ក្រុមហ៊ុន Tiger បានមកដល់កម្ពុជាហើយ ដោយមានការគាំទ្រពីសំណាក់អ្នកគាំទ្រជាច្រើននាក់។
ក្នុងដំណើរមកដល់នេះដែរ Giggs បាននិយាយសរសើរប្រទេសកម្ពុជា ហើយពិតជារីករាយដែលមានឱកាសបានឈានជើងចូលប្រទេសនៅតំបន់អាស៊ានមួយនេះ។ មួយវិញទៀត លោកក៏រំពឹងថានៅថ្ងៃស្អែកនេះ នឹងបានឃើញយុវជនកម្ពុជាបង្ហាញសមត្ថភាពរបស់ពួកគេនៅក្នុងការប្រកួតវគ្គផ្ដាច់ព្រ័ត្រ Tiger Street Football Festival 2018 ។
អ្វីដែលកាន់តែអស្ចារ្យថែមទៀតនោះ Giggs បានបញ្ជាក់ថាលោកមកកម្ពុជានេះ មិនមែនជាលើកទី១នោះទេ ពោលគឺធ្លាប់មកម្ដងហើយ ប៉ុន្តែមិនបានមកភ្នំពេញទេ នៅតាមជាយដែនជាប់ប្រទេសថៃឯណោះ។ ដោយកាលនោះ ស្នាក់នៅទឹកដីកម្ពុជា ប្រហែល១០ម៉ោង។
នៅថ្ងៃស្អែកនេះ បុរសវ័យ៤៤ឆ្នាំរូបនេះនឹងមានវត្តមាននៅទីលាន Tiger Street Football Festival 2018 នាកោះពេជ្រ មុនបើកសន្នីសីទកាសែតជាផ្លូវការនៅពេលរសៀល។ នាពេលល្ងាច អតីតគ្រូបង្វឹករបស់ Manchester United រូបនេះ ក៏នឹងមានការប្រកួតបង្ហាញសមត្ថភាពខ្លះៗឱ្យអ្នកគាំទ្រទស្សនាផងដែរ៕
ប្រភពពី: Sabay