ខ្សែបម្រើចាស់វស្សា Andres Iniesta ក្នុងថ្ងៃនេះ បានបង្ហើបថា ខ្លួននឹងធ្វើការសម្រេចចិត្ត អំពីអនាគតខ្លួននៅ Barcelona នៅមុនពេលដាច់ខែក្រោយ។
ខ្សែបម្រើអេស្ប៉ាញ បាននិយាយប្រាប់សារព័ត៌មាន Marca ថា នឹងធ្វើការសម្រេចចិត្តទាក់ទងនឹងអនាគតខ្លួននៅក្លឹបអ្នកមានបុណ្យនៅមុនថ្ងៃទី ៣០ មេសា។
Iniesta បានថ្លែងថា៖ “ការសម្រេចចិត្តនេះ មានតែពីរប៉ុណ្ណោះ មួយគឺ បន្តនៅ និងមួយទៀត គឺចាកចេញពីក្លឹប”។ ការនិយាយបែបនេះ ធ្វើឡើងជាង ៥ខែប៉ុណ្ណោះ ក្រោយខ្សែបម្រើអេស្ប៉ាញ បានចុះកុងត្រាមួយជីវិតឲ្យក្លឹបអ្នកមានបុណ្យ។
Iniesta គឺជាកីឡាករដ៏ឆ្នើមរបស់ក្លឹប Barcelona អស់រយៈពេលជាច្រើនឆ្នាំ ប៉ុន្តែ ការនាំចូលកីឡាករប្រេស៊ីល Philippe Coutinho កាលពីខែមករានេះ ត្រូវបានមតិបាល់ទាត់ជាច្រើនលើកឡើងថា គឺជាការត្រៀមរបស់ក្លឹបក្នុងការជំនួសកីឡាករអេស្ប៉ាញដែលមានវ័យកាន់តែចាស់។ ទោះជាយ៉ាងណា កន្លងមក Iniesta បានទាត់ចោលពាក្យនេះ ហើយថា ការទិញ Coutinho ជាជំនួយមួយដល់ក្លឹបឲ្យលេងកាន់តែល្អទៅវិញ៕
