បាល់ទាត់៖ ​តារា​ឆ្នើម​នៃ​ក្លឹប Barcelona , Lionel Messi បាន​បង្ហាញ​យ៉ាង​ជាក់ច្បាស់​ថា​រូបគេ​នឹង​ចូល​និវត្តន៍​ពី​ក្រុមបាល់ទាត់​ជម្រើស​ជាតិ ប្រសិន​ណា​អា​ហ្ស​ង់​ទិន​មិន​ឈ្នះ​ជើងឯក World Cup នៅ​រដូវ​ក្តៅ​នេះ។

Super Star រូប​នេះ​បាន​បន្ត​ថា​វា​មិន​ជោគជ័យ​ឡើយ​ បើ​មិន​បាន​ឈ្នះ​ពាន​ឲ្យ​ប្រទេសជាតិ ខណៈ​ដែល​នៅ​ក្លឹប​អាជីព​គេ​បាន​ជួយ​ឲ្យ​ក្លឹប​ឈ្នះ​ពាន​រាប់មិនអស់​នោះ។​ ​គួរ​រំលឹក​ថា ​អា​ហ្ស​ង់​ទិន​ចាញ់​អាល្លឺម៉ង់​នៅ​លើ​ទឹកដី​ប្រេ​ស៊ី​ល​កាល ៤​ឆ្នាំមុន​នៅ​ម៉ោង​បន្ថែម ១៥នាទី ២​លើក និង​ចាញ់​បាល់​ប៉េ​ណា​ល់​ទី​ក្រោម​ថ្វី​ជើង​ឈីលី​ទៀត​នៅ Copa America ផងដែរ។​ ​គេ​នៅចាំ​បាន​ដែរ​ថា Messi បាន​ចាក​ចេញពី​ក្រុម​ជម្រើស​ជាតិ​អា​ហ្ស​ង់​ទិន​នៅ​ឆ្នាំ ២០១៦ ក្រោយ​ខូចចិត្ត​ជា​ខ្លាំង​ពេល​មិន​អាច​ជួយ​យក​ពាន​អ្វី​សោះ ខណៈ​សុទ្ធតែ​បាន​ឡើង​ទៅ​វគ្គ​ផ្ដាច់ព្រ័ត្រ ប៉ុន្តែ​ត្រូវ​បាន​អ្នកគាំទ្រ និង​សមាជិក​សហព័ន្ធ​សំណូមពរ​ឲ្យ​គេ​វិល​ចូល​ជួយ​ជម្រើស​ជាតិ​ ដើម្បី​ដឹកនាំ​អា​ហ្ស​ង់​ទិន​ធ្វើសង្គ្រាម​លើ​វាលស្មៅ​នៅ​រុស្សី​ឆ្នាំនេះ។

​​Lionel Messi មាន​ក្តី​ស្រ​ម៉ៃ​ថា​ នឹង​ឈ្នះ​ពាន​បាល់ទាត់​ពិភពលោក​នៅ​រុស្ស៊ី​ឆ្នាំនេះ នេះ​បើ​តាម​ការ​ដក់​ស្រង់​រប​ស់​ការ​សែត La Cornisa។​ ​គួរ​បញ្ជាក់​ថា​ នៅ​ក្នុង​សប្ដាហ៍​នេះ Messi នឹង​មកកាន់​ទីក្រុង Manchester ក្នុងនាម​ជា​កីឡាករ​ក្រុម​ជម្រើស​ជាតិ​អា​ហ្ស​ង់​ទិនប្រកួត​មិត្តភាព​ជាមួយ​អ៊ីតាលី និង​ការប្រកួត​មិត្ត​ផ្សេងទៀត​ផង​ដែរ៕
Via: Bayon