ក្រុមហង្សក្រហម Liverpool បានយកឈ្នះ Crystal Palace ២ ទល់នឹង១នៅទឹកដី Selhurst Park កាលពីយប់មិញ តែបានបាត់បង់កម្លាំងសំខាន់ម្នាក់ដោយសាររបួស។
ខ្សែបម្រើប្រយុទ្ធ Adam Lallana បានប្ដូរចូលនៅនាទី៦៥ជំនួស Wijnaldum តែមានបញ្ហាជើងត្រូវប្ដូរចេញនៅ៥នាទីបន្ទាប់ ដោយដាក់ខ្សែការពារ Dejan Lovren វិញ។ កីឡាករវ័យ២៩ឆ្នាំរូបនេះត្រូវគេប្រទះឃើញកាន់ឈើច្រត់ចេញពីឡានក្រុង ដែលមើលទៅអាការៈដូចមិនស្រាលពេកទេ។
អតីតកីឡាករ Southampton ទើបតែជាពីរបួសប៉ុណ្ណោះ ហើយពេលនេះមានបញ្ហាម្ដងទៀតដែលអាចឲ្យគេអវត្តមានទៅ World Cup ជាមួយតោកំណាចអង់គ្លេស។ បញ្ហានេះលោក Jurgen Klopp អ្នកចាត់ការ Liverpool បានសារភាពថា Lallana ពិតជាមានស្ថានភាពមិនល្អពិតប្រាកដមែន។
“មើលទៅពិតជាអាក្រក់។ ពិតណាស់អាការៈរបស់ Lallana មិនស្រាលទេ ពិសេសគឺត្រង់សាច់ដុំ។ យ៉ាងណាយើងសង្ឃឹមថាគេ មិនអវត្តមានយូរទៅចុះ។ Klopp និយាយដូច្នេះ។ Lallana គឺជាកីឡាករ Liverpool ទីពីរមានបញ្ហារបួសបន្ទាប់ពី Joe Gomez ដែលទើបត្រូវគ្រូបង្វឹក Southgate ដកចេញពីជម្រើសជាតិថ្មីៗ៕
