ខ្សែបម្រើប្រយុទ្ធ Kevin De Bruyne ក្នុងថ្ងៃនេះ បាននិយាយថា វាពិតជារឿង “ពិសេស” បើសិនជា Manchester City ឈ្នះក្លឹបរួមក្រុម Manchester United នៅជំនួបថ្ងៃទី ៧ខាងមុខ ហើយលើកពាន Premier League។
កីឡាករបែលហ្សិក បានថ្លែងប្រាប់អ្នកសារព័ត៌មានថា៖ “វាពិតជារឿងពិសេស បើសិនជាយើងអាចយកឈ្នះ Manchester United ហើយលើកពាន Premier League មែន”។
De Bruyne បន្ត៖ “វាពិតជារឿងមួយដ៏អស្ចារ្យ សម្រាប់អ្នកគាំទ្រយើង បើយើងធ្វើបានសម្រេច។ អ្នកបានដឹងហើយពីប្រវត្តិនៃភាពប្រកួតប្រជែងរវាងក្លឹបទាំងពីរ។ យើងនឹងបង្កើតប្រវត្តិសាស្ត្រថ្មីមួយ ក្រោយជ័យជំនះនេះ”។
ទោះជាយ៉ាងណា ខ្សែបម្រើប្រយុទ្ធបែលហ្សិកក៏បាននិយាយផងដែរពីមូលហេតុមួយទៀតដែលខ្លួនចង់ឈ្នះពាន Premier League ឲ្យបានកាន់ឆាប់ នោះគឺចង់ទុកពេលសម្រាប់ផ្ដោតអារម្មណ៍លើប្រកួតក្រោយៗ។
មុនពេលប៉ះជាមួយបិសាចក្រហមនៅថ្ងៃទី ៧មេសាខាងមុខ ក្លឹបយក្សមេឃខៀវ ត្រូវលេងប៉ះជាមួយហង្សក្រហម Liverpool ក្នុងជំនួបជើងទី ១ Champions League វគ្គ៨ក្រុមនៅវេលាអាធ្រាត្រម៉ោង ១:៤៥ នាទី ថ្ងៃទី ៥ មេសា។
បើតាមតារាងលីគបច្ចុប្បន្ន ក្រោយលេង ៣១ប្រកួត ក្លឹប Manchester City កំពុងឈរលេខ ១ ជាមួយនឹងពិន្ទុចំនួន ៨៤ ខណៈបិសាចក្រហមដែលជាក្លឹបកំពុងស្ថិតនៅលេខ ២ មានត្រឹមតែ ៦៨ ពិន្ទុ។ ដូច្នេះការឈ្នះលើក្លឹបអ្នកជិតខាង របស់មេឃខៀវនៅថ្ងៃទី ៧ មេសាខាងមុខ នឹងធ្វើឲ្យក្លឹបលើកពាន Premier League តែម្ដង៕
Via: Sabay
