ភ្នំពេញៈ អតីតខ្សែប្រយុទ្ធដ៏ល្បីឈ្មោះរបស់ប្រទេសហូឡង់ Ruud van Nistelrooy ដែលធ្លាប់ទទួលបានជោគជ័យយ៉ាងធំធេង ក្នុងអាជីពបាល់ទាត់របស់ខ្លួន នៅក្លិបបិសាចក្រហម Manchester United និងក្លិបយក្សរបស់អេស្ប៉ាញ Real Madrid នោះ បានបង្ហាញពីភាពសប្បាយរីករាយ ក្នុងដំណើរនាំពានរង្វាន់ UEFA Champions League មកដល់ប្រទេសកម្ពុជា កាលពីចន្ទ ប៉ុន្តែរូបគេចង់ស្វែងយល់ពីវិស័យបាល់ទាត់នៅកម្ពុជាបន្ថែមទៀត។
ជាមួយនឹងទឹកមុខសប្បាយរីករាយ ពេលមកដល់ព្រលានយន្តហោះអន្តរជាតិភ្នំពេញ កាលពីថ្ងៃចន្ទនោះ Nistelrooy បានថ្លែងប្រាប់ប្រព័ន្ធផ្សព្វផ្សាយថា៖ «នេះជាលើកទី ១ ដែលខ្ញុំបានធ្វើដំណើរមកដល់ប្រទេសកម្ពុជា ហើយខ្ញុំពិតជាមានអារម្មណ៍សប្បាយខ្លាំងមែនទែន ព្រោះវាជាពេលវេលាដែលខ្ញុំបានមកជួបអ្នកគាំទ្ររបស់ខ្ញុំនៅទីនេះ ក៏ដូចមនុស្សជាច្រើនទៀត ដែលស្រឡាញ់ និងចូលចិត្តវិស័យបាល់ទាត់ដូចគ្នា»។
យ៉ាងណាក៏ដោយ Nestelrooy ដែលធ្លាប់ជាប់ឈ្មោះជាកីឡាករស៊ុតបាល់បញ្ចូលទីបានច្រើនជាងគេចំនួន ៣ លើកនៅ UEFA Champions League នោះ ចង់ស្វែងយល់ពីវិស័យបាល់ទាត់របស់កម្ពុជាបន្ថែមទៀត តាមរយៈការបង្ហាត់បង្ហាញពីបច្ចេកទេស បទពិសោធ និងទិចនិកនៃការលេងបាល់ទៅដល់អ្នកគាំទ្រនៅកម្ពុជា។
កីឡាករវ័យ ៤១ ឆ្នាំរូបនេះបានបន្ថែមថា៖ «ខ្ញុំក៏បានត្រៀមខ្លួនរួចជាស្រេចផងដែរ ក្នុងការស្វែងយល់បន្ថែមទៀតពីវិស័យកីឡាបាល់ទាត់នៅកម្ពុជា ក៏ដូចជាប្រជាជននៅកម្ពុជា ហើយខ្ញុំនឹងត្រូវចែករំលែកពីទិចនិកនៃការលេងបាល់ទៅដល់អ្នកគាំទ្រនៅកម្ពុជា ក្នុងអំឡុងពេលខ្ញុំស្នាក់នៅប្រទេសនេះផងដែរ»។
ក្នុងនាមជាកីឡាករអាជីពបាល់ទាត់ដ៏ល្បីឈ្មោះនៅលើពិភពលោក Ruud van Nistelrooy ដែលកើតនៅឆ្នាំ ១៩៧៦ បានជាប់ជម្រើសជាតិហូឡង់ ពីឆ្នាំ ១៩៩៨ ដល់ឆ្នាំ ២០១១ ដោយរកបាន ៣៥ គ្រាប់ ក្នុងការបង្ហាញខ្លួនចំនួន ៧០ ដង គឺបន្ទាប់ពីរូបគេលេងឲ្យក្លិបក្នុងស្រុកចំនួន ២ គឺ Den Bosch និងក្លិប Heerenveen។
Via: Phnompenh post