ក្រុងសឺវីលល៍: លោក Jupp Heynckes គ្រូបង្វឹករបស់ Bayern Munich បានបញ្ជាក់ថា ក្លិបនេះ នឹងរក្សាទុកតារាឆ្នើម James Rodriguez ក្នុងរយៈពេល ១ ឆ្នាំទៀត ហើយបន្ទាប់មក នឹងសម្លឹងរកការចុះហត្ថលេខាជាមួយនឹងខ្សែប្រយុទ្ធរូបនេះក្នុងកិច្ចសន្យាជាអចិន្ត្រៃយ៍ពីក្លិប Real Madrid។
ប៉ុន្តែ លោក Heynckes ដែលបាននិយាយនៅមុនពេលការប្រកួតក្របខ័ណ្ឌ Champions League របស់ក្រុម Bayern ក្នុងវគ្គ ៨ ក្រុមចុងក្រោយ ជើងទី ១ ក្នុងទីក្រុង Seville បានច្រានចោលថា ខ្សែប្រយុទ្ធ Robert Lewandowski របស់ Bayern នឹងផ្ទេរទៅកាន់ក្លិប Real នៅរដូវក្តៅខាងមុខនេះ។
James បានយល់ព្រមលើលក្ខខណ្ឌខ្ចីជើងរយៈពេល ២ ឆ្នាំ នៅពេលដែលរូបគេបានចូលរួមជាមួយនឹងក្លិប Bayern ពីក្លិប Real Madrid កាលពីឆ្នាំមុន ហើយតារាឆ្នើមអន្តរជាតិ កូឡុំប៊ីរូបនេះ បានស្ថិតក្នុងទម្រង់លេងយ៉ាងល្អឥតខ្ចោះនៅរដូវកាលនេះ។
ក្លិបកំពូលៗជាច្រើនកំពុងតែចាប់អារម្មណ៍ទៅលើការទិញយកកីឡាករវ័យ២៦ឆ្នាំរូបនេះ ប៉ុន្តែ លោក Heynckes ដែលនឹងត្រូវចូលនិវត្តន៍នៅចុងរដូវកាលនេះ ជឿជាក់ថា រូបគេនឹងនៅតែបន្តនៅជាមួយនឹង Bayern។
លោក Heynckes បានឲ្យដឹងកាលពីថ្ងៃចន្ទថា៖ «រូបគេពិតជារីករាយក្នុងការស្ថិតក្នុងទីក្រុង Munich និងនៅជាមួយ Bayern។ ខ្ញុំគិតថា រូបគេនឹងបន្តនៅនាឆ្នាំក្រោយ និងបន្ទាប់ពីឆ្នាំនោះ។ Bayern ត្រូវតែសម្រេចចិត្តនៅពេលណាដែលពួកគេត្រូវទិញរូបគេ»៕
Via PhnomPenh Post
