នៅសល់តែជាង ២ខែ កន្លះ ទៀតប៉ុណ្ណោះ ព្រឹត្តិការណ៍ប្រកួតបាល់ទាត់ពិភពលោក World Cup នឹងឈានចូលមកដល់។ ស្របក្នុងន័យនេះ អត្ថបទនឹងបង្ហាញពីប្រាក់ឈ្នួលដែលអាជ្ញាកណ្ដាលកំពូលៗមានបទពិសោធន៍យូរឆ្នាំ នឹងទទួលបានក្នុងកម្មវិធីដ៏ធំនេះ។
ក្នុងព្រឹត្តិការណ៍ World Cup នៅរុស្ស៊ីខាងមុខ មានការចូលរួមពីអាជ្ញាកណ្ដាលសរុបចំនួន ៣៦ នាក់ និងជំនួយការអាជ្ញាកណ្ដាលចំនួន ៦៣ នាក់ទៀត។
ប្រាក់ឈ្នួលសម្រាប់អាជ្ញាកណ្ដាល មានការប្រែប្រួលតាមបទពិសោធន៍ និងប្រវត្តិរូបនៃអាជីពរបស់ពួកគេ។
បើយោងតាមសារព័ត៌មានប្រេស៊ីល UOL Esporte ហើយយកចុះផ្សាយដោយ Marca ក្នុងថ្ងៃនេះ បានឲ្យដឹងថា អាជ្ញាកណ្ដាលកំពូលៗដូចជា លោក Felix Brych (សញ្ជាតិអាល្លឺម៉ង់), Cuneyt Cakir (សញ្ជាតិទួរគី) និង Nestor Pitana (សញ្ជាតិអាហ្សង់ទីន) នឹងទទួលបានប្រាក់ឈ្នួលគោល ៥៧០០០ អឺរ៉ូ (ជាង ៧ ម៊ឺនដុល្លារសហរដ្ឋអាមេរិក) គួបផ្សំនឹងប្រាក់បន្ថែមចំនួន ២៥០០ អឺរ៉ូ (ជាង ៣ ពាន់ដុល្លារ) ក្នុងមួយប្រកួត។
ចំណែកឯជំនួយការអាជ្ញាកណ្ដាលវិញ នឹងទទួលបានប្រាក់គោលចំនួន ២ ម៊ឺនអឺរ៉ូ (ជាង ២៤០០០ដុល្លារ) និង ប្រាក់បន្ថែមចំនួន ១៦០០ អឺរ៉ូ (ជិត ២ពាន់ដុល្លារ) ក្នុងមួយប្រកួត៕
Via :news.sabay