Manchester United បានវិលមករកទម្រង់លេងល្អវិញក្រោយយកឈ្នះ Bournemouth ២-០ ក្រៅដីក្នុងការប្រកួត Premier League សប្ដាហ៍ទី៣៤។
កាលពីអាទិត្យមុនក្រុមបិសាចក្រហមបានភ្លាត់ចាញ់ West Bromwich ១-០ នៅ Old Trafford ធ្វើឲ្យ Manchester City ក្លាយជាជើងឯកលីគកំពូលអង់គ្លេសដោយស្វ័យប្រវត្តិ។ Smalling និង Lukaku គឺជាតួអង្គសំខាន់សម្រាប់ជ័យជម្នះរបស់ United បន្ទាប់ពីស៊ុតចូលម្នាក់មួយគ្រាប់នៅនាទី ២៨ និង៧០។
អ្នកចាត់ការ Jose Mourinho បានហៅជ័យជម្នះនេះថាគឺជាការត្រៀមខ្លួនយ៉ាងល្អរបស់ក្រុមលោកសម្រាប់ការប៉ះជើងខ្លាំង Tottenham Hotspur ថ្ងៃសៅរ៍នៅ Wembley ក្នុងពាន FA Cup វគ្គពាក់កណ្ដាលផ្ដាច់ព្រ័ត្រ។
បើឈ្នះ Man Utd នឹងឡើងទៅវគ្គផ្ដាច់ព្រ័ត្រ ហើយរងចាំការឈ្នះរវាង Chelsea និង Southampton ដែលប្រកួតគ្នានៅថ្ងៃអាទិត្យ លើទីលាន Wembley តែមួយ៕
