ទម្រង់លេងរបស់ក្លឹប Real Madrid នៅកីឡដ្ឋាន Estadio Santiago Bernabeu ក្នុងរដូវកាលនេះ គឺអាក្រក់បំផុត គិតចាប់ពីរដូវកាល ២០០០/០១ មក។
ក្នុងចំណោមក្លឹបភ្ញៀវចំនួន ២៦ ដែលបានមកប្រកួតជាមួយ Real Madrid ក្នុងរដូវកាលនេះ មាន ១២ ដែលលេងឈ្នះ ឬយ៉ាងហោចណាស់លេងបានស្មើជាមួយក្លឹបយក្សអេស្ប៉ាញ។
ការណ៍នេះ ធ្វើឲ្យ Real Madrid មានកំណត់ត្រាលេងមិនសូវល្អក្នុងដីខ្លួនឯង។ ក្នុង ២៦ ប្រកួតដែលលេងនៅ Santiago Bernabeu ក្លឹបបានយកឈ្នះ ១៤ លើក ស្មើ ៧ ដង ចាញ់ ៥ដង ស៊ុតចូល ៦៤គ្រាប់ ប៉ុន្តែធ្លាយវិញ ៣២គ្រាប់។
បើធៀបនឹងចំនួនប្រកួតដូចគ្នា ស្ថិតិ Real Madrid ខាងលើ ជាតួលេខដ៏ទាបដែលក្លឹបមិនធ្លាប់មានពីមុនមកគិតចាប់តាំងពីរដូវកាល ២០០០/០១មក។
លើកចុងក្រោយដែល ក្លឹប Real Madrid ពើបប្រទះនឹងកំណត់ត្រាប្រកួតក្នុងដីអាក្រក់ប្រហាក់ប្រហែលនេះ គឺ រដូវកាល១៩៩៩/២០០០។ កាលនោះ ក្លឹបបានចាញ់ Real Zaragoza ៥-១, Athletic Bilbao ៣-១, Bayern Munich ៤-២ និងការចាញ់ព្រមទាំងស្មើជាមួយក្លឹបគូប្រជែងជាច្រើនទៀត។
ការបាត់បង់ពីរពិន្ទុដោយការស្មើជាមួយ Athletic Bilbao កាលពីយប់មិញ ធ្វើឲ្យក្លឹបជ្រុះពិន្ទុសរុប ១៧ ហើយក្នុងប្រកួតក្នុងផ្ទះ នារដូវកាល ២០១៧/១៨ នេះ។
Real Madrid កំពុងឈរលេខ ៣ ក្នុងលីគកំពូលអេស្ប៉ាញ មាន ៦៨ពិន្ទុ៕
Via :news.sabay
