អ្នកចាត់ការក្លឹប Manchester United លោក Jose Mourinho ក្នុងថ្ងៃនេះ បានសម្ដែងការគោរពរបស់ខ្លួនទៅកាន់លោក Arsene Wenger ដែលនឹងចាកចេញពី Arsenal នៅពេលរដូវកាលនេះចប់។ លោកសង្ឃឹមថា អ្នកចាត់ការសញ្ជាតិបារាំង នឹងមិនទាន់ចូលនិវត្តន៍។
ថ្លែងក្នុងសន្និសីទសារព័ត៌មាន លោក Mourinho បាននិយាយថា លោកសប្បាយនឹងការសម្រេចចិត្តរបស់លោក Wenger។ អ្នកចាត់ការសញ្ជាតិព័រទុយហ្គាល់លើកឡើងថា៖ “ខ្ញុំច្បាស់ក្នុងចិត្ត ក្នុងប្រកួតថ្ងៃខាងមុខ យើងManchester United នឹងបង្ហាញក្ដីគោរពទៅលើលោក Wenger ដែលជាគូប្រជែងរបស់ក្លឹបតាំងពីជំនាន់ Sir Alex មក។ លោក Wenger ស័ក្ដិសមនឹងទទួលការគោរពនេះណាស់”។
ការប្រកួតដែលលោក Mourinho និយាយនោះសំដៅលើជំនួប Premier League រវាងបិសាចក្រហម និងកាំភ្លើងធំនៅថ្ងៃទី ២៩ មេសាខាងមុខ។
អ្នកចាត់ការបិសាចក្រហមមិនបានស្ដាយក្រោយទេ ដែលធ្លាប់មានទំនាស់ពាក្យសម្ដីជាមួយលោក Wenger កាលពីពេលកន្លងទៅ។ លោកថា អ្វីដែលសំខាន់ គឺលោកមានការគោរពទៅកាន់លោក Wenger ក្នុងនាមជាមនុស្ស អ្នករួមអាជីព និងអាជីពដែលអ្នកចាត់ការសញ្ជាតិបារាំងបានកសាងឡើង។
“ចំពោះអ្នកខ្លះ ការចងចាំគឺមានរយៈពេលខ្លីណាស់ តែចំពោះអ្នកដែលប្រឡូកក្នុងអាជីពបាល់ទាត់ពិតប្រាកដវិញ ការចងចាំមិនមែនខ្លីឡើយ។ បើសិនជាលោក (Wenger) សប្បាយចិត្តនឹងការសម្រេចចិត្តមួយនេះ ខ្ញុំក៏សប្បាយដែរ ហើយខ្ញុំសង្ឃឹមថា លោកនឹងមិនទាន់ចូលនិវត្តន៍ពីបាល់ទាត់”។ លោក Mourinho បន្ត៕
Via :news.sabay
