គ្រាប់បាល់ស៊ុតបញ្ចូលទីនៅជិតបញ្ចប់ការប្រកួតរបស់ខ្សែការពារអន្តរជាតិសេណេហ្គាល់ Kalidou Koulibaly បានរក្សាក្តីសង្ឃឹមនៃការឈ្នះពានរបស់ក្រុម Napoli ខណៈដែលពួកគេបានកត់ត្រាជ័យជម្នះ ១-០ លើក្រុមម្ចាស់ការពារតំណែងជើងឯក Juventus កាលពីថ្ងៃអាទិត្យ ដើម្បីកាត់បន្ថយពិន្ទុដេញតាមពីក្រោយមកនៅត្រឹម ១ពិន្ទុនៅលើតារាងក្របខ័ណ្ឌ Serie A។
Koulibaly បានតែតបាល់រកគ្រាប់បាល់ឈ្នះនៅនាទីចុងក្រយោ ដើម្បីជួយឲ្យក្រុម Napoli ដណ្តើមបានជ័យជម្នះជាលើកទី១ របស់ពួកគេនាកីឡដ្ឋាន Allianz។ ពិន្ទុនាំមុខរបស់ក្រុមម្ចាស់ជើងឯក ៦សម័យកាល នៅលើកំពូលតារាង ត្រូវបានកាត់បន្ថយមកនៅត្រឹម១ពិន្ទុ ខណៈដែលនៅសល់ការប្រកួត ៤លើកទៀត។
វាជាការបរាជ័យជាលើកទី៣ នៅរដូវកាលនេះ និងជាលើកទី២ នៅលើទឹកដីខ្លួនឯងសម្រាប់ក្រុម Juventus ដែលការបរាជ័យជាលើកចុងក្រោយរបស់ពួកគេបានកើតឡើងកាលពីថ្ងៃទី១៩ ខែវិច្ឆិកា។ Juventus មាន ៨៥ពិន្ទុពីការប្រកួត ៣៤លើក ខណៈដែល Napoli ដែលកំពុងតែប្រមាញ់រកបានឈ្នះពាន Scudetto ជាលើកទី៣ របស់ខ្លួន ក្រោយពីឈ្នះកាលពីឆ្នាំ១៩៨៧ និង១៩៩០នោះ មាន ៨៤ពិន្ទុ។ Koulibaly វ័យ ២៦ឆ្នាំ បានឲ្យដឹងថា៖ «យើងបានដឹងថា វានឹងក្លាយជាការប្រកួតដ៏លំបាក និងសំខាន់មួយ ប៉ុន្តែ យើងបានធ្វើរាល់អ្វីៗទាំងអស់ដើម្បីឈ្នះ យើងធ្វើបានសម្រេច និងពិតជាមានមោទនភាពទៅលើខ្លួនយើងផ្ទាល់»៕
Koulibaly ជួយឲ្យ Napoli ផ្តួល Juventus ដើម្បីកាត់បន្ថយការដេញតាមពីក្រោយត្រឹម ១ពិន្ទុ
អត្ថបទទាក់ទង