Sergio Ramos នឹងដើរតួជាប្រធានក្រុមដឹកនាំជម្រើសជាតិអេស្ប៉ាញប្រយុទ្ធក្នុងព្រឹត្តិការណ៍ World Cup 2018 ហើយនេះជាលើកទី៤ហើយ ដែលកីឡាករ Real Madrid ចូលរួមក្រុមព្រឹត្តិការណ៍ដ៏ធំនេះ។
ក្នុងវគ្គជម្រុះនៅតំបន់អឺរ៉ុបកន្លងទៅអេស្ប៉ាញឈរលេខ១ពូល G។ ក្រោយចាប់ឆ្នោតចែកពូលដើម្បីប្រកួតនៅប្រទេសរុស្សីក្រុមរហស្សនាមគោជល់ស្ថិតនៅ B ដោយត្រូវប្រឈមមុខនឹងជម្រើសជាតិព័រទុយហ្គាល់ ម៉ារ៉ុក និងអ៊ីរ៉ង់។ សម្រាប់ពូលនេះ ព័រទុយហ្គាល់ត្រូវបានគេចាត់ទុកជាគូប្រជែងធំរបស់អេស្ប៉ាញ។ អេស្ប៉ាញបានឡើងមកលេង WC សរុបទាំងឆ្នាំនេះទៀតគឺ១៤ដងហើយ។
និយាយពីបញ្ជីឈ្មោះដែលអេស្ប៉ាញបានកោះហៅទៅប្រទេសរុស្សី Ramos ជាកីឡាករមានបទពិសោធន៍ច្រើនជាងគេ ពោលលេងបាន១៥១ប្រកួត។ កីឡាករវ័យ៣២ឆ្នាំឈានជើងលេង World Cup ដំបូងនៅឆ្នាំ២០០៦ រៀបចំនៅប្រទេសអាល្លឺម៉ង់កាលនោះមានវ័យ២០ឆ្នាំ។ កាលនោះគេលេងជាខ្សែការពារស្ដាំ ជួយក្រុមឡើងផុតពូល ប៉ុន្តែធ្លាក់ត្រឹមវគ្គ១៦ក្រុមចុងក្រោយ។
ឆ្នាំ២០១០ ក្រោមការដឹកនាំរបស់លោក Vicente del Bosque បានកោះហៅ Ramos ជាថ្មីដើម្បីចូលជម្រើសជាតិលេង World Cupនៅអាហ្វ្រិកខាងត្បូង។ វាឆ្នាំដ៏ជោគជ័យធ្វើឲ្យពិភពលោកស្គាល់ប្រធានក្រុម Real Madrid កាន់តែច្បាស់ ដោយសារគេបានរួមចំណែកលេងគ្រប់នាទីឲ្យអេស្ប៉ាញឡើងផ្ដាច់ព្រ័ត្រ យកឈ្នះហូឡង់ ១-០ លើកពាន WC លើកដំបូងក្នុងជីវិត។
World Cup ឆ្នាំបន្ទាប់ធ្វើនៅប្រទេសប្រេស៊ីល គោជល់អេស្ប៉ាញត្រូវគេចាត់ទុកថា អាចការពារជើងឯករបស់ខ្លួនបាន ខណៈ Ramos នៅតែមានឈ្មោះលេងក្នុងព្រឹត្តិការណ៍នេះ។ តែអ្វីៗខុសពីការរំពឹងទុក អេស្ប៉ាញស្ថិតនៅពូលដ៏លំបាកជាមួយ ហូឡង់ ឈីលីនិងអូស្ត្រាលី។ ៣ប្រកួតអេស្ប៉ាញធ្វើមិនបានល្អឡើយ ពោលឈ្នះ១ ចាញ់២ បានត្រឹមលេខ៣ក្នុងពូល មិនអាចបន្តដំណើរទៅមុខទៀតបាន។
ឆ្នាំ២០១៨ កីឡាករប្ដូរតំណែងមកការពារកណ្ដាល Ramos នៅតែស្ថិតក្រោមក្រសែភ្នែកគ្រូថ្មីលោក Julen Lopetegui និងទទួលងារជាប្រធានក្រុមទៀតផង។ ដូច្នេះនេះជាលើកទី៤ ហើយដែល Sergio Ramos បានប្រលូកក្នុងព្រឹត្តិការណ៍ World Cup។ ចាំមើលគេជួយអេស្ប៉ាញបានដល់កម្រិតណា?
Via :news.sabay
