ក្រុមបាល់ទាត់ជម្រើសជាតិជប៉ុន បានដណ្តើមយកប្រៀបទៅលើបញ្ហាតំបន់ការពារ និងបាល់ពិន័យ១១ម៉ែត្រដ៏ចម្រូងចម្រាស់ ខណៈដែលពួកគេបានផ្តួលក្រុមជម្រើសជាតិអ៊ីរ៉ង់ ក្នុងលទ្ធផល ៣-០ ក្នុងព្រឹត្តិការណ៍ Asian Cup វគ្គពាក់កណ្តាលផ្តាច់ព្រ័ត្រ ដើម្បីត្រូវការត្រឹមតែជ័យជម្នះ១លើកទៀតប៉ុណ្ណោះដើម្បីឈ្នះពានជាលើកទី៥របស់ពួកគេកាលពីថ្ងៃចន្ទ។

កីឡាករ Yuya Osako បានជួយឲ្យក្រុមជប៉ុន នាំមុខ ១-០ បន្ទាប់ពីបញ្ចប់តង់ទី១ នៅពេលដែលខ្សែការពាររបស់ក្រុមអ៊ីរ៉ង់ បានឈប់ដើម្បីតវ៉ាជាមួយនឹងអាជ្ញាកណ្តាល ហើយបន្ទាប់មក បានស៊ុតបាល់ពិន័យ ១១ម៉ែត្រ ដែលត្រូវបានផ្តល់ឲ្យ ក្រោយពីរូបភាពវីដេអូចាកផ្សាយឡើងវិញបានបង្ហាញពីការធ្វើឲ្យបាល់ប៉ះដៃរបស់កីឡាករ Morteza Pouraliganji។ បន្ទាប់មក កីឡាករ Genki Haraguchi បានស៊ុតបាល់បញ្ចូលទីនៅជិតបញ្ចប់ការប្រកួតដើម្បីបំពេញជ័យជម្នះសម្រាប់ក្រុមខ្លួន ខណៈដែលលទ្ធផលនេះបានកើតឡើងដោយគ្មានការរំពឹងទុកនៅពេលប្រកួតជាមួយនឹងក្រុមខ្លាំងដូចជាអ៊ីរ៉ង់ ដែលបានស៊ុតបាល់បញ្ចូលទីសរុប១២គ្រាប់ ដោយមិនរបូតវិញ១គ្រាប់ ដើម្បីឈានទៅវគ្គ១/២ផ្តាច់ព្រ័ត្រ។

វាគឺជាការប្រកួតចុងក្រោយសម្រាប់គ្រូបង្វឹកនៃក្រុមអ៊ីរ៉ង់លោក Carlos Queiroz ដែលនឹងចាកចេញពីក្រុមនេះ ក្រោយពីបានកាន់តំណែងរយៈពេល៨ឆ្នាំ ក្នុងនោះរាប់បញ្ចូលទាំងដឹកនាំក្រុមនេះក្នុងយុទ្ធនាការ World Cup ២លើកផងដែរ។ លោក Queiroz បានបញ្ជាក់ថា ការប្រព្រឹត្តកំហុសដែលមិនដឹងអី បានបង្កើតឲ្យមានគ្រាប់បាល់បើកឆាក នៅពេលដែលកីឡាករបានឡោមព័ទ្ធជុំវិញអាជ្ញាកណ្តាល ខណៈដែលជប៉ុនបានបន្តលេង និងបានស៊ុតបាល់បញ្ចូលទី ដើម្បីផ្តួលពួកគេតែម្តង៕

អត្ថបទ៖ Cambosport
ប្រភព៖ Channel News Asia