ក្រុមជម្រើសជាតិអាយុក្រោម២៣ឆ្នាំរបស់ វៀតណាម ថៃ និង ម៉ាឡេស៊ី បានក្លាយជាបេក្ខភាពតែ៣ក្រុមគត់ នៅក្នុងតំបន់អាស៊ាន ដែលបានឡើងទៅកាន់ការប្រកួតវគ្គ១៦ក្រុម ឬជុំផ្តាច់ព្រ័ត្រ នៃពានរង្វាន់ AFC U23 Asian Cup Uzbekistan 2022 ប៉ុន្តែក្រុមU23 កម្ពុជា បានត្រឹមសោកស្តាយ ខណៈពួកគេ បានធ្លាក់ចេញពីក្រុមលេខ២ល្អទាំង៤ ដែលត្រូវបានយកទៅប្រកួតនៅវគ្គបន្តដែរនោះ។
តាមរយៈការប្រកួតជម្រុះតាមពូល នៃពានរង្វាន់ AFC U23 Asian Cup Uzbekistan 2022 នេះក្រុមជម្រើសជាតិវៀតណាមអាយុក្រោម២៣ឆ្នាំ និងម៉ាឡេស៊ី សុទ្ធតែដណ្តើមបានលេខ១ នៅតាមពូលរៀងៗខ្លួន សម្រាប់ការទទួលបានឱកាស ឡើងទៅកាន់ការប្រកួតជុំផ្តាច់ព្រ័ត្រ នៅប្រទេស Uzbekistan នាឆ្នាំ២០២២។
ក្រុមU23វៀតណាម បានឈ្នះទាំង២ប្រកួត លើក្រុមមីយ៉ាន់ម៉ា និងក្រុម Chinese Taipei ក្នុងលទ្ធផល ១-០ ដូចគ្នា ដើម្បីទទួលបានលេខ១ ប្រចាំពូលI ចំណែកក្រុមជម្រើសជាតិម៉ាឡេស៊ី បានបញ្ចប់ការប្រកួតទាំង៣លើក ជាមួយការឈ្នះ២ និងស្មើ ជាមួយក្រុមថៃ ដើម្បីទទួលបានលេខ១ ប្រចាំពូលJ។
យ៉ាងណាក៏ដោយ ក្រុមU23ថៃ បានជាប់ចំណាត់ថ្នាក់លេខ១ នៅក្នុងចំណោមក្រុមលេខ២ល្អ ទាំង១០ក្រុម ចំណែកក្រុម Saudi Araboia ក្រុម Turkministan និង ក្រុម Tajikistan ក៏បានជាប់ជាក្រុមលេខ២ល្អទាំង៤ ដែលត្រូវបន្តដំណើរទៅកាន់ការប្រកួតវគ្គ១៦ក្រុមចុងក្រោយ ផងដែរ។
ប៉ុន្តែក្រុមជម្រើសជាតិកម្ពុជាអាយុក្រោម២៣ឆ្នាំ ព្រមទាំងក្រុមមីយ៉ានើម៉ា និងសិង្ហបុរី សុទ្ធតែមិនបានជាប់ នៅក្នុងចំណោមក្រុមលេខ២ល្អ ដោយក្រុមទាំង៣នេះ រួមជាមួយក្រុមលេខ២ មកពីពូលចំនួន៣ទៀត សុទ្ធតែបានធ្លាក់ចេញពីការប្រកួតនេះដូចគ្នា។
គួរបញ្ជាក់ថា សម្រាប់ការប្រកួតជម្រុះតាមពូលនេះ ក្រុមU23កម្ពុជា ដែលឈរនៅពូល K បានយកឈ្នះក្រុមហុងកុង ៤-២ តែបានចាញ់ក្រុមម្ចាស់ផ្ទះជប៉ុន ៤-០ ដោយឈរនៅចំណាត់ថ្នាក់លេខ២ មាន៣ពិន្ទុ ហើយបានជាប់ត្រឹមលេខ៧ ក្នុងចំណោមក្រោមលេខ២ មកពីបណ្តាពូលទាំង១០ បើទោះបីជា កម្ពុជា មាន៣ពិន្ទុស្មើជាមួយក្រុម Saudi Araboia ក្រុម Turkministan និង ក្រុម Tajikistan ក៏ដោយ ព្រោះកម្ពុជា មានគ្រាប់បាល់ចំណេញតិចជាង (-២) ក្រុមទាំង៣នេះ រួមទាំងក្រុមមីយ៉ាន់ម៉ា៕
