លោក Ole Gunner Solskjaer បានកោតសរសើរលើស្មារតីមិនចុះចាញ់របស់តារាឆ្នើមៗនៃក្រុម Manchester United របស់ពួកគេ ខណៈដែលពួកគេបានឈានទៅវគ្គ៨ក្រុមចុងក្រោយនៃក្របខ័ណ្ឌ Champion League តាមរយៈការដណ្តើមបានជ័យជម្នះជាកំណត់ត្រាក្នុងលទ្ធផល ៣-១ លើក្រុម Paris Saint Germain កាលពីថ្ងៃពុធ។
Man United បានក្លាយជាក្រុមដំបូងគេក្នុងប្រវត្តិសាស្ត្រនៃពាន European Cup ក្នុងការស្រោចស្រង់ពីការចាញ់ក្នុងជើងទី១នៃវគ្គចាញ់ធ្លាក់ក្នុងលទ្ធផល ២-០ លើទឹកដីខ្លួនឯង។
ខ្សែប្រយុទ្ធ Romelu Lukaku បានស៊ុតបាល់បញ្ចូលទី២គ្រាប់ នៅចន្លោះពេលនៃការរកគ្រាប់បាល់តាមស្មើរបស់កីឡាករ Juan Bernat នៅមុនពេលខ្សែប្រយុទ្ធ Marcus Rashford បានស៊ុតបាល់ប៉េណាល់ទីនៅជិតបញ្ចប់ការប្រកួតដែលត្រូវបានផ្តល់ឲ្យដោយប្រព័ន្ធវីដេអូជំនួយការអាជ្ញាកណ្តាល (VAR) ដើម្បីជួយឲ្យក្រុម Man United ឈានទៅវគ្គបន្ត តាមរយៈគ្រាប់បាល់ក្រៅដី។
នេះគឺជាលទ្ធផលដ៏មិននឹកស្មានដល់ ដោយសារតែ Man United បានអវត្តមានខ្សែបម្រើដ៏មានឥទ្ធិពល Paul Pogba ក៏ដូចជាតារាឆ្នើមៗជាច្រើនទៀតរួមមាន Anthony Martial, Jesse Lingard និង Ander Herrera។
ប៉ុន្តែ លោក Solskjaer អ្នកចាត់ការទូទៅបណ្តោះអាសន្នរបស់ក្រុម Man United បានបញ្ជាក់ថា លោកមិនដែលមានការសង្ស័យថា កីឡាកររបស់លោកអាចធ្វើរឿងដ៏មិននឹកស្មានដល់ក្នុងវគ្គ១៦ក្រុមចុងក្រោយ ជើងទី២ ក្នុងទីក្រុងប៉ារីស ឡើយ។
លោក Solskjaer បានប្រាប់ទូរទស្សន៍ BT Sport ថា៖ «ការជឿជាក់លើកីឡាករ គឺជាក្តីសង្ឃឹមរបស់យើងប៉ុណ្ណោះ។ វាពិតជាអស្ចារ្យណាស់។ អ្នកតែងតែដឹងថា វាអាចទៅរួច។ ជាមួយនឹងក្លិបមួយនេះ នេះគឺជាអ្វីដែលយើងធ្វើ។ យើងជាក្រុម Man United។ វាជាការប្រកួតក្នុងក្របខ័ណ្ឌ Champoins League ហើយនោះគឺជាលទ្ធផលដែលយើងធ្វើបាន»៕
ប្រភពព័ត៌មាន៖ Cambosport
