ខ្សែប្រយុទ្ធក្លឹប Sampdoria កីឡាករ Fabio Quagliarella បានក្លាយកីឡាករដែលមានអាយុច្រើនជាងគេក្នុងប្រវត្តិសាស្ត្របាល់ទាត់អ៊ីតាលី ដោយរកគ្រាប់បាល់បាននៅអាយុ ៣៦ឆ្នាំ ៥៤ថ្ងៃ បន្ទាប់ពីរូបគេបានស៊ុតបាល់ពិន័យ ១១ម៉ែត្រចំនួន២គ្រាប់ ក្នុងប្រកួតវគ្គជម្រុះ UEFA Euro 2020 ប៉ះនឹងក្រុមជម្រើសជាតិលិចធិនស្តែន។
ក្នុងប្រកួតកាលពីយប់ថ្ងៃអង្គារនេះដែរ កីឡាករ Quagliarella បានបង្ហាញខ្លួនចំនួន ៧២នាទី ហើយក្រៅពីរកគ្រាប់បាល់បាន កីឡាកររូបនេះក៏បញ្ជូនបាល់ឲ្យខ្សែប្រយុទ្ធវ័យក្មេងរបស់ក្លឹប Juventus កីឡាករ Moise Keane ស៊ុតបញ្ចូលទីផងដែរ។ Fabio បានបំបែកកំណត់ត្រាចាស់របស់ អតីតខ្សែការពារស្លាបស្ដាំកីឡាករ Christian Panucci ដែលរកគ្រាប់បាល់ចុងក្រោយរបស់ខ្លួនឲ្យក្រុមជម្រើសជាតិអ៊ីតាលីក្នុងអាយុ ៣៥ឆ្នាំ ៦២ថ្ងៃ កាលពីឆ្នាំ២០០៨។
កីឡាកររូបនេះធ្លាប់បានកោះហៅឲ្យចូលលេងក្នុងក្រុមជម្រើសជាតិអ៊ីតាលីកាលពីឆ្នាំ២០០៧ រហូតដល់ឆ្នាំ២០១០ លុះឆ្នាំ២០១៩ ទើបសហព័ន្ធបាល់ទាត់អ៊ីតាលីកោះហៅម្ដងទៀត បន្ទាប់ពីបានបង្ហាញទម្រង់លេងនៅក្លឹប Sampdoria បានយ៉ាងល្អ ដោយរកគ្រាប់បាល់បាន ២១គ្រាប់នៅក្នុងលីគកំពូលអ៊ីតាលី និងក្លាយជាកីឡាកររកគ្រាប់បាល់ច្រើនជាងគេក្នុងលីគផងដែរ៕
