លោកគ្រូបង្វឹកថ្មី Ole Gunnar Solskjaer ដែលទើបនឹងចូលកាន់តំណែងថ្មី នៅក្នុងក្លឹបបីសាចក្រហម Manchester United គ្មានបំណងជះលុយច្រើនសន្ធឹកសន្ធាប់ពេលទីផ្សារដោះដូរកីឡាករបើកនៅរដូវក្ដៅខាងមុននេះទេ បើទោះជាទើបឡើងកាន់តំណែងថ្មីៗនេះក៏ដោយ។
Solskjaer បុរសសញ្ជាតិន័រវែស ត្រូវបានក្លឹបផ្ដល់សេចក្ដីទុកចិត្តតែងតាំងជាអ្នកចាត់ការពេញសិទ្ធកាលពីថ្ងៃព្រហស្បតិ៍ ទើបធ្វើឲ្យមានសំណួរចោទសួរថាលោកមានគម្រោងចាយទ្រង់ទ្រាយធំ ដើម្បីត្រៀម នៅរដូវកាលថ្មីនេះ ឬក៏អត់។ អ្នកចាត់ការមុន Jose Mourinho បានចាយប្រមាណ៣៦០លានផោនលើការទិញកីឡាករ និងលក់បានមកវិញតែ៧៥លានប៉ុណ្ណោះ។
តែទោះជាយ៉ាងណាក៏ដោយលោក Ole Gunnar Solskjaer វិញបាននិយាយថា លោកមិនប្រញាប់ប្រញាល់ពេកទេក្នុងការទិញកីឡាករថ្មី ពិសេសគឺការទិញកីឡាករឲ្យតែបានថាទិញ ប៉ុន្តែវាគ្មានប្រសិទ្ធិភាព។ “ជាការពិតសំរាប់ក្រុមបីសាចក្រហម Manchester United មួយនេះគឺជាក្លឹបអ្នកមាន ប៉ុន្តែអ្នកដែលស្គាល់ខ្ញុំនឹងដឹងហើយថា ខ្ញុំចាយលុយតែពេលចាំបាច់ប៉ុណ្ណោះ និងមិនចាយខុសគោលដៅ” ហើយនេះជាគោលដៅពិតរបស់ខ្ញុំ៕
