លោក Pep Guardiola គ្រូបង្វឹកក្រុម Manchester City បានព្រមានខ្សែការពារ Benjamin Mendy ឲ្យកាត់បន្ថយការដើរលេងរបស់គាត់កុំឲ្យដល់យប់ជ្រៅពេក បន្ទាប់ពីមានគេបានឃើញខ្សែការពារក្លិប Manchester City រូបនេះស្ថិតនៅក្នុងក្លិបរាត្រីមួយកន្លែងនៅពេលទៀបភ្លឺកាលពីព្រឹកថ្ងៃសៅរ៍កន្លងមកនេះ។
ប្រព័ន្ធផ្សព្វផ្សាយរបស់អង់គ្លេសបាននិយាយកាលពីថ្ងៃអង្គារថា កីឡាករ Mendy មិនត្រូវបានដាក់ឲ្យលេងនៅក្នុងការប្រកួតក្របខ័ណ្ឌ Premier League នៅពេលដែលក្រុម Manchester City បានទទួលជ័យជម្នះកាលពីយប់ថ្ងៃសៅរ៍នោះទេ។ ប៉ុន្តែផ្ទុយទៅវិញខ្សែការពាររូបនេះគ្រោងនឹងចូលរួមក្នុងការហ្វឹកហាត់មួយ ខណៈគាត់បានព្យាយាមរក្សារាងរបស់គាត់កុំឲ្យធាត់ខ្លាំងពេក ក្រោយពីបញ្ចប់រដូវកាលដែលពោរពេញទៅដោយការរងរបួសរួចហើយ។
តារាបាល់ទាត់បារាំងគឺកីឡាករ Mendy ត្រូវបានគេរាយការណ៍ថា បានចូលទៅលេងនៅក្លិបរាត្រីមួយកន្លែងនៅក្នុងទីក្រុង Manchester ប្រទេសអង់គ្លេសរហូតដល់ម៉ោង ២ និង ៣០ នាទីថ្ងៃសៅរ៍សប្ដាហ៍មុន។ គ្រូបង្វឹកក្លិប Man City គឺលោក Guardiola បាននិយាយថាលោកមិនអាចបង្ខំឲ្យ Mendy ស្ថិតនៅតែក្នុងផ្ទះនោះទេ ប៉ុន្តែលោកបានបញ្ជាក់ថាលោកមានការខកចិត្តខ្លាំងណាស់ ចំពោះទង្វើដែលកីឡាកររូបនេះបានប្រព្រឹត្តក្នុងពេលថ្មីៗនេះ។
ខ្សែការពារ Mendy វ័យ ២៤ ឆ្នាំរូបនេះបានរងរបួស ២ លើក ហើយបានខកខានការប្រកួតជាច្រើនលើកក្នុងរដូវកាលដំបូងរបស់គាត់នៅក្លិប Manchester City នេះដោយសាររបួស លោក Guardiola បានបញ្ជាក់ថាពេលនេះខ្សែប្រយុទ្ធ Mendy មានស្ថានដូចធម្មតាវិញហើយ ហើយមានបំណងចូលរួមប្រកួតជាមួយនឹងក្រុម Cardiff នៅថ្ងៃពុធនៅកីឡដ្ឋាន Etihad ផងដែរ៕
Manchester City : ខ្សែការពារ Benjamin Mendy ត្រូវបានគ្រូបង្វឹក Pep Guardiola ព្រមាន
អត្ថបទទាក់ទង