ប្រធានសមាគមសហភាពបាល់ទាត់អឺរ៉ុបហៅកាត់ថា UEFA លោក Aleksander Ceferin បាននិយាយកាលពីថ្ងៃអង្គារថា លោកសោកស្ដាយចំពោះការកើតមាននូវការប្រកាន់ពូជសាសន៍ក្នុងពេលថ្មីៗនេះ ដូចជាខ្សែបម្រើ Raheem Sterling កីឡាករ Danny Rose និង Callum Hudson-Odoi ដែលបានធ្វើឲ្យប៉ះពាល់ដល់ការប្រកួតនៅរដូវកាលនេះ។ ហើយលោក Ceferin នឹងស្នើសុំឲ្យអាជ្ញាកណ្ដាលកុំស្ទាក់ស្ទើរក្នុងការបញ្ឈប់ការប្រកួតចោលភ្លាមក្នុងករណីមានការបៀតបៀនពូជសាសន៍កើតឡើងនៅកន្លែងប្រកួត។
លោក Ceferin បាននិយាយនៅកីឡដ្ឋាន Wembley កាលពីថ្ងៃអង្គារក្នុងសន្និសីទកាសែតស្ដីពី «ការប្រកួតស្មើគ្នា» ដើម្បីជួយដោះស្រាយការរើសអើងនេះថា៖ «ខ្ញុំពិតជាសោកស្ដាយណាស់ដែលនៅឆ្នាំ ២០១៩ នេះយើងត្រូវធ្វើសន្និសីទ ដើម្បីផ្សព្វផ្សាយពីការគោរពសិទ្ធិគ្នាបែបនេះ ហើយវាគួរឲ្យបារម្ភមែនទែននៅពេលឃើញមេដឹកនាំ និងអ្នកនយោបាយពិភពលោកចេញមុខនិយាយសម្រាលស្ថានការណ៍ជុំវិញការរើងអើងពូជសាសន៍បែបនេះ»។
លោក Ceferin បានបន្តថា៖ «នេះជាបញ្ហាធំមួយដែលតែងកើតឡើងមិនត្រឹមតែនៅតំបន់បាកង់ប៉ុណ្ណោះទេ តែវាក៏តែងកើតឡើងនៅតំបន់អឺរ៉ុបខាងកើតផងដែរដូចអ្នកបានដឹងហើយ នៅប្រទេសអ៊ីតាលី គឺជាប្រទេសមួយដែលមានបញ្ហាច្រើនបំផុតពាក់ព័ន្ធនឹងការរើសអើងពូជសាសន៍ រើសអើងភេទ និងរើសអើងអ្នកស្រឡាញ់ភេទដូចគ្នាជាដើម»។ ប្រធានសមាគមបាល់ទាត់ (FA) លោក Greg Clarke បាននិយាយថា ប្រទេសអង់គ្លេសក៏ត្រៀមលក្ខណៈបង្កើនការផ្ដន្ទាទោស ឬទណ្ឌកម្មប្រឆាំងនឹងទង្វើរើសអើងពូជសាសន៍ផងដែរ។
ប្រធានសមាគមសហភាពបាល់ទាត់អឺរ៉ុប Aleksander Ceferin ថាសោកស្ដាយចំពោះការប្រកាន់ពូជសាសន៍
អត្ថបទទាក់ទង