ខ្សែប្រយុទ្ធ Shane Long របស់ក្លិប Southampton រកបានគ្រាប់បាល់លឿនជាងគេបំផុតក្នុងប្រវត្តិសាស្ត្រនៃក្របខ័ណ្ឌ Premier League កាលពីថ្ងៃអង្គារ ក្រោយពីបានស៊ុតបាល់បំប៉ោងសំណាញ់ទី នៅនាទី ទី៧,៦៩វិនាទី ក្នុងពេលក្រុមរបស់គេបានបញ្ចប់ក្នុងលទ្ធផលស្មើ ១-១ នៅលើទឹកដីក្រុម Watford ដែលរកបាន១ពិន្ទុតាមរយៈគ្រាប់បាល់នៅជិតបញ្ចប់ការប្រកួតរបស់កីឡាករ Andre Gray។
គ្រាប់បាល់ជាកំណត់ត្រារបស់ Long បានកើតឡើងភ្លាមៗ ក្រោយពីការចែកបាល់ នៅពេលដែលរូបគេបានរារាំងការព្យាយាមទាត់បាល់ចេញឲ្យឆ្ងាយរបស់ខ្សែការពារ Craig Cathcart មុននឹងខ្សែប្រយុទ្ធអន្តរជាតិអៀរឡង់ខាងរូបនេះ បានស៊ុតបាល់រំលងក្បាលរបស់អ្នកចាំទី Ben Foster។
ការស៊ុតបាល់បញ្ចូលទីយ៉ាងល្អរបស់ខ្សែប្រយុទ្ធវ័យ៣២ឆ្នាំរូបនេះ បានបំបែកកំណត់ត្រានៃការរកបានគ្រាប់បាល់លឿនជាងគេបំផុតកាលពីមុនក្នុងក្របខ័ណ្ឌ Premier League ដែលរកបានដោយខ្សែការពារ Ledley King របស់ក្លិប Tottenham នៅនាទី ទី៩,៩វិនាទី នៅពេលប្រកួតជាមួយនឹងក្រុម Bradford កាលពីខែធ្នូ ឆ្នាំ២០០០។
ក្រោយពីការប្រកួតនេះ Long បានប្រាប់បណ្តាញសារព័ត៌មាន Sky Sports News ថា៖ «វាជាកំណត់ត្រាមួយនេះ មែនទេ?។ ក្រោយពីការចែកបាល់ភ្លាមៗ យើងចង់ដាក់សម្ពាធដល់ពួកគេ។ ៩៩លើកក្នុងចំណោម១០០លើកដែលអ្នកព្យាយាមរារាំងការស៊ុតបាល់ចេញឆ្ងាយ ហើយការព្យាយាមនោះមិនបានសម្រេច ប៉ុន្តែ ពេលនេះ វាបានសម្រេច»។
គ្រាប់បាល់ជាប្រវត្តិសាស្ត្ររបស់ Long ដែលជាគ្រាប់បាល់ទី៤របស់គេនៅរដូវកាលនេះ មិនមែនជាគ្រាប់បាល់ឈ្នះនាកីឡដ្ឋាន Vicarage Road ឡើយ ក្រោយពីការរកបានគ្រាប់បាល់តាមស្មើរបស់ Gray នៅនាទី ទី៩០ សម្រាប់ក្រុម Watford ប៉ុន្តែ លទ្ធផលនេះ បានជួយឲ្យក្រុម Southampton នាំមុខ៦ពិន្ទុពីលើក្រុមស្ថិតក្នុងតំបន់កាត់ចោល ខណៈនៅសល់ការប្រកួត៣លើកទៀត៕
ប្រភពព័ត៌មាន៖ Channel News Asia
Long រកបានគ្រាប់បាល់លឿនជាងគេបំផុតក្នុងប្រវត្តិសាស្ត្រនៃ Premier League
អត្ថបទទាក់ទង