កាលពីព្រឹកថ្ងៃអង្គារនេះក្លឹបជើងឯកនៅអ៊ីតាលី Juventus បានត្រៀមខ្លួនយ៉ាងល្អ ដើម្បីប្រជែងជាមួយនឹងក្លឹបមាន់ខ្នាយមាស Tottenham Hotspur ដើម្បីទិញយកកីឡាករ Ryan Sessegnon ក្នុងតំលៃប្រមាណ ៤០លានផោនឯណោះ ពីក្លឹបរួមលីហ្គ Fulham។
ដុំពេជ្រមិនទាន់ច្នៃវ័យ ១៨ឆ្នាំរូបនេះ ប្រហែលជាមិនអាចបន្តរស់នៅយូរទៀតឡើយក្នុងកីឡដ្ឋាន Craven Cottage បន្ទាប់ពីក្លឹបរបស់ខ្លួន Fulham ត្រូវបានកាត់ចេញពីលីហ្គអង់គ្លេស Premier League នារដូវកាលក្រោយ ទោះនៅសល់ ៣សប្ដាហ៍ទៀតចប់ក៏ដោយ។
ក្លឹប Fulham បានប្រកាសពីជំហររបស់ខ្លួនថា ពួកគេចង់បានរង្វាន់ ៤០លានផោនសម្រាប់ Sessegnon ក្រោមការដឹកនាំបណ្ដោះអាសន្នដោយលោក Scott Parker ស្របពេលដែលគ្រូបង្វឹក Spurs លោក Pochettino សម្លឹងឃើញគុណភាពនៃការបណ្ដើរបាល់ បច្ចេកទេសគ្រប់គ្រងនៅស្លាបដ៏ល្អបំផុត។
គួរបញ្ជាក់ថា Sessegnon បានចាប់ផ្ដើមជាកីឡាករយុវជនរបស់ Fulham តាំងពីឆ្នាំ២០០៨ រហូតដល់ដើមឆ្នាំ២០១៦ មុនពេលត្រូវកាត់ចូលឲ្យប្រកួតក្រុមធំនៅពាក់កណ្ដាលឆ្នាំ២០១៦ ហើយបើគិតមកទល់ពេលនេះ កីឡាករកើតនៅក្រុងឡុងដ៏មួយនេះប្រកួតបាន ១០១ប្រកួត និងស៊ុតបញ្ចូលទីបាន ២២គ្រាប់ហើយ ខណៈក្រុមជម្រើសជាតិអង់គ្លេសវិញ គេជាប់ជាយុវជនអាយុក្រោម ២១ឆ្នាំប្រកួតបាន ៨លើកផងដែរ៕
ក្លឹបមាន់ខ្នាយមាស Spur និង Juventus ប្រជែងគ្នាទិញកីឡាករ Ryan Sessegnon ក្នុងតំលៃ ៤០លានផោន
អត្ថបទទាក់ទង